“Хәтер бакчасы” изге хәтерне саклый

Акция кысаларында үсен­­­теләрне утыртуда, шулай ук, республика Хөкү­мә­те әгъза­лары, Херсон өлкә­се губернаторы урынбасары, Русия Хөкүмәте кар­шын­дагы Херсон өлкәсе даи­ми вәкиллеге җитәкчесе Владимир Боделан, көч структуралары җи­тәк­че­лә­ре, Белорет һәм Мәләвез рай­оннарыннан унынчы сый­ныф укучылары катнашты.

“Патриот” паркында 300 юкә утыртылды. Моннан тыш, биредә нарат аллеясе барлыкка килде. Агач­лар­ның берсе Кырымнан, ул – Сева­стопольдән рәх­мәт символы. Агач үсен­тесен Башкортстанга Мәскәүдә оештырылган “Россия” күр­гәзмә­сендә тө­бәк­ләр ара­сын­дагы дуслык билгесе буларак тапшырганнар иде.

– Без бүген “Хәтер бакчасы” акциясенә старт бирдек. Аның әһәмияте бик зур, – диде Радий Хәбиров. – Агач утырту гына түгел, безнең табигатьне һәм урманнарны саклау өчен дә бу бик әһәмиятле чара. Иң мөһиме – утыртылган һәр үсенте Советлар Союзының Бөек Ватан сугышында һәлак булган 27 миллион ке­ше­сенең истәлегенә багышлана. Бу – безнең мәрхү­мнәргә хөрмәтебез билгесе.
“Патриот” паркында Радий Хәбиров Туймазы авылында яшәүче Алан Вәли­евка һәм Мирослав Фазлыевка, Нефтекамадан Ярослав Юламановка һәм Уфадан Егор Стринадкога “Кайнар йөрәк” дип аталучы күкрәк билгеләре тапшырды. Укучылар әлеге бүләккә үз яшьтәш­ләренең һәм бәлагә тарыган кечкенә балаларның гомерен коткарганда күрсәткән батырлыгы өчен лаек булды.

Радий Хәбиров, шулай ук, “Патриот” хәрби-патриотик паркын үстерү буенча эшлекле киңәшмә уздырды.

Мәгариф һәм фән министры Илдар Мәүлет­бирдин, курсантлар өчен 200 кешелек тулай торак, парашюттан сикерү тренажеры өчен вышка төзелде, уку корпусына капиталь ремонт ясалды, дип хәбәр итте. Биредә, шулай ук, “Партизан авылы” комплексы, спорт үзәге һәм “Геройлар узышы” ярышлары өчен трасса эшләп килә.

Былтыр федераль проект кысаларында һәрберсе 49 кешегә исәпләнгән ике модуль сафка кертелде, яңа ашханә эшли башлады, анда төрле рацион белән биш тапкыр ашату оештырылган, квадроциклларда ярышлар үткәрү өчен физкультура-савыктыру комплексы һәм трасса төзе­леше төгәлләнгән. Җәйге лагерьларны модер­низа­ция­ләүнең федераль программасы буенча тагын ике модуль төзелә. Аларны сафка бастырганнан соң “Авангард” укыту-методик үзәгендә ел саен 10 меңнән артык курсант белем алу мөмкинлеге алачак.

Парк төзелешенең өчен­че этабында мунча-кер юу комплексын капиталь ремонтлауга керешәчәкләр. Шулай ук тир төзү һәм “Партизан авылы” комплексына кадәр юлны асфальтлау каралган. Республика Башлыгы, киләсе елда төзелеш-монтаж эшлә­ренә керешү өчен, әлеге объектларны проектлауны быел төгәл­ләргә кушты.

Радий Хәбиров шунда ук башкорт теленнән Халыкара диктантта катнашты.

Быел бу чара республикада унынчы тапкыр уздырылды. Ул беренче тапкыр 2015 елда үтте. Журналист Рәшидә Мәһәдиеваның бу идеясен ул вакытта БашДУ (хәзерге Уфа Фән һәм техно­логияләр университеты) галимнәре Риф Әхмә­диев, Гөлфирә Абдуллина һәм Николай Морозкин хуплаганнар иде. Башлангычны иҗти­магый оешмалар да күтәреп алды.

Диктант башланыр алдыннан Радий Хәбиров Халыкара акциягә нигез салучыларга һәм инициаторларга Башкортстанның дәүләт бүләкләрен тапшырды.

Диктант тәмамлангач, Башкортстан Башлыгына “Һомай” акыллы колонкасы проектын тәкъдим иттеләр. Исегезгә төшерәбез: “Һо­май” платформасы базасындагы проектлар республика Башлыгы Грантлары фондының еллык конкурсында ике тапкыр җиңүче булды. Идея авторы – җәмәгать эшлеклесе, IT-белгеч Айгиз Кунафин. Акыллы колонка нигезенә ясалма интеллектлы чат-бот салынган.

Журналистлар белән әңгәмә вакытында Радий Хәбиров “Патриот” паркында чаралар уздыру максаты турында сөйләде.

– Бүген без монда беренче тапкыр башкорт теленнән диктант яздык. Парк шул исәп­тән мәгъри­фәтчелек функ­циясен дә үти. Аның территориясендә хәрби әзер­лек узу оештырыла, ирек­леләр, директор­ларның тәр­бия эшләре буенча киңәш­челәре җыела. Паркның инфраструктурасы төрле чаралар үткәрергә мөмкинлек бирә. Шуңа күрә биредә диктант та язарга булдык, – дип ассызыклады Радий Хәбиров.

Башкортстан Башлыгы Радий Хәбиров Евразия күчмә цивилизацияләр музее төзелеше мәйдан­чы­гын­да булды. Биредә 600 квадрат метр мәйданлы заманча визит-үзәк бинасы төзелә.

Исегезгә төшерәбез: музей проектын төбәк җитәк­чесе 2022 елның июлендә “Шүлгәнташ” тарихи-мәдәни комплексын ачуда тәкъдим иткән иде. Яңа объект концептуаль рәвештә берничә төп тарихи ядкарьне берләш­терәчәк, алар арасында: Турахан һәм Хөсәен бәкнең ХIV-XV гасырлардагы Алтын Урда чоры таш төрбәсе.

Радий Хәбиров визит-үзәк төзелеше барышы белән танышты. Анда артефактлар экспозициясе, лекцияләр залы, депозитарий, кафе һәм манзара мәйданчыгы урнашачак. Визит-үзәктә тарихи ядкарь күчермәсе – Госман Коръ­әне куелачак. Бу басма республикага үткән елның маенда беренче Халыкара китап ярминкәсе кысаларында тапшырылды. Әле Коръ­ән Кәрим вакытлыча Баш­кортстанның Милли музеенда саклана.

Журналистлар белән әңгәмәдә Радий Хәбиров музей комплексын этаплап үстерү планнары турында сөйләде.

– Без бу территорияне туристлар өчен ачу өстендә актив эшлибез. Мин күп тапкырлар әйттем, туризмны икътисадның мөһим өлеше буларак карыйбыз. 6 июль­дә без Госман Коръәне экспозициясе белән визит-үзәк ачарга планлаштырабыз. “Китап бәйрәме” Халыкара китап ярминкәсендә игълан ите­ләчәк православие ядкарен дә шунда урнаштырасыбыз килә, – дип бил­геләп үтте төбәк җитәк­чесе. – Евразия күчмә циви­лизацияләр музе­еның төп бинасын проект­лыйбыз инде. Бу – 20 мең квадрат метр мәйданлы зур объект. Аның янәшәсендә башкорт аты һәм ау кошлары үзәге төзибез. Анда ике зур ипподром, этноавыл булачак. Биредә халык кәсепләрен тергезәчәкбез, кунакларга ата-бабаларыбызның ничек яшәгәнен күрсәтәчәкбез.

Чишмә районында Башкортстан Башлыгы Радий Хәбиров урындагы торак-коммуналь хуҗалык пред­при­ятиеләре эшчән­леге белән танышты.

Аларның берсе – “УЮТ” җәмгыяте территорияләрне төзекләндерү һәм яшел­лән­дерү, юлларны карау-тоту һәм агымдагы ремонтлау, шулай ук чүп җыю һәм чыгару белән шөгыльләнә. Республика Башлыгының махсус хәрби операциядә катнашу­чыларның гаилә­ләрен утын белән тәэмин итү буенча йөкләмәсенә ярашлы рәвеш­тә, предприя­тиедә утын хәзерләүне дә оештырганнар.

Чишмә районында Радий Хәбиров Спорт урамындагы 1нче һәм 2нче йорт­ларның ишегалды террито­риясендә булды. Аны былтыр “Башкортстан ихаталары” республика программасы кысаларында төзеклән­дергәннәр.

Эш сәфәре вакытында Башкортстан Башлыгы Радий Хәбиров Чишмә райо­ны үзәгендәге Башкортстан агросәнәгать колледжы филиалында булды.
Филиал мөдире Гөлнара Гайнетдинова уку корпу­сы­ның һәм студентлар өчен тулай торак бина­сының 1957 елда төзел­гәнлеге һәм шуннан бирле бер тапкыр да ремонтланмаганлыгы турында сөйләде.

Төбәк җитәкчесе кол- лед­ж­ның уку-җитештерү һәм көнкүреш биналарын карады. Педагоглар белән аралашканда Радий Хәбиров механизатор, төзүче, башка эшче һөнәрләренә ихтыяҗ­ның зур булуын билгеләп үтте. Аерым алганда, республикада, бө­тен илдәге кебек үк, төзелеш күләме арта, һәм пред­прия­тиеләргә профессиональ кад­р­лар кирәк.

Башкортстан Башлыгы республика Хөкүмәтенә – объектны проектлауга кере­шергә, ә төбәкнең Мәгариф һәм фән министрлыгына 2025 елда Башкортстан агро­сәнәгать коллед­жының Чиш­мә филиалын ремонтлауны башларга кушты.

Радий Хәбиров Чишмә районыннан махсус хәрби операциядә һәлак булган хәрбиләрнең гаиләләре белән очрашты.

Төбәк җитәкчесе хәрби­ләрнең гаиләләренең кайгысын уртаклашты, шулай ук генерал Шәйморатов орденнарын Артур Йолчуев, Айдар Ситдыйков, Андрей Стручков, Инзир Собханкулов, Азат Суфиянов, Алик Фәйзуллин, Александр Феоктистов һәм Дмитрий Хәлимовның туганнарына һәм якыннарына тапшырды. Сугышчылар хәрби бурычларны үтәгәндә күр­сәткән батырлыклары өчен үлгәннән соң югары бүләккә лаек булды.

– Шундый балалар үстер­гәнегез өчен сезгә чын күңелдән рәхмәт белдерәм. Алар – чын геройлар, һәм безнең уртак бурычыбыз – алар турындагы истәлекне саклау, – диде Радий Хәби­ров. – Сез хәрби бурыч­ларын үтәгәндә һәлак булган чын ир-егетләр, патриотлар, Ватанны саклаучыларны тәр­бия­ләгәнсез. Без алар белән горурланабыз һәм, һич­шиксез, һәлак булган сугыш­чыларның әти-әниләрен, гаиләләрен, балаларын игътибарсыз калдырмаячакбыз.

Башкортстан Башлыгы искәрткәнчә, Чишмә районындагы “Патриот” хәрби-патриотик паркы Русия Герое Максим Серафимов исемен йөртә.

– Бу парк Ватан өчен гомерләрен биргән сезнең балаларыгызга да багышлана. Без бу мәйданчыкны актив үстерәбез, анда яңа корылмалар, шул исәптән ФОК һәм бассейн төзибез, – диде Радий Хәбиров. – Чишмә районы халкы да, “Патри­от”ка килеп, әлеге объект­лардан файдалана алачак.

Һәлак булган сугышчы­ларның әти-әниләре, үз чиратында, республика Башлыгына аларның проблемаларына шәхси игътибар биргән өчен рәхмәт белдерде.

Радий Хәбиров искәртеп узуынча, республикада СВОда катнашучыларның гаилә­ләренә ярдәм чара­ла­рының киң исемлеге га­мәлдә. Шулай ук, ул очрашуда хәрбиләрнең туганнары һәм якыннары биргән сораулар буенча берничә йөкләмә бирде.

Фәнүз ХӘБИБУЛЛИН.