Бәйрәм рухы белән йөгерделәр

Бүген Илеш районында Бөек Җиңүнең 81 еллыгына, "Русия халыклары бердәмлеге елы"на һәм “Маяк Илеш” район гәзите призына багышланган 31нче җиңел атлетика эстафетасы үтте. Спорт бәйрәмендә район мәктәпләре һәм уку йортлары укучылары актив катнашты.

Быелгы эстафетага 7-9нчы һәм 10-11нче сыйныфлар укучыларыннан торган 9 команда чыкты. Барлыгы 72 спортчы көч сынашты. Ярыш 8 этаптан торды, ә катнашучылар 2 чакрым араны йөгереп узды.

Бәйге маршрутының төп өлеше Кызыл Армия, Октябрьнең 50 еллыгы, Ленин һәм Совет урамнары буйлап үтте. Спортчылар Мәңгелек ут янында финишка килде. Бу мизгел бәйрәмгә аеруча дулкынландыргыч һәм патриотик рух өстәде.

Кече яшь төркемендә беренче урынны Югары Яркәйнең 4нче мәктәбе командасы яулады. Икенче урын — 1нче гимназия командасында, өченче урынны Карабаш урта мәктәбе укучылары алды.

Өлкән яшь төркемендә исә җиңүче булып 1нче гимназия танылды. Икенче урынга — БАТК, өченче урынга Т. Рахманов исемендәге мәктәп командасы лаек булды.

“Маяк Илеш” гәзите баш мөхәррире урынбасары М. Кыдрасова, җиңүчеләрне һәм призерларны котлап, кубоклар, медальләр һәм Мактау грамоталары тапшырды.

Эстафета чын спорт бәйрәменә әверелде. Ярышлар дуслык, бердәмлек, патриотизм рухында узды. Тамашачылар да, катнашучыларны дәртләндереп, көчле алкышлар белән куәтләде.