Һәркем уяу булырга тиеш!

21 августта Русиядә һәм башка илләрдә Халыкара террорчылык корбаннарын искә алу көне билгеләп үтелә. Ул БМОның Генераль ассамблеясе тарафыннан 2017 елның 19 декаб­рендә гамәлгә куелган.

Кызганычка каршы, бү­генге көндә террорчылык – ул гомумдөнья проблемасы, аннан төрле илләр һәм халыклар каза күрә. Еш кына зыян күрү­челәр тән һәм җан яраларын уңалту, лаеклы тормыш алып бару мөм­кинлеген тыштан ярдәм бул­ганда гына алырга мөмкин. Ул психологик, социаль, финанс ярдәмне, тернәклән­дерүне үз эченә ала. Ләкин барысын да дәвалап бетереп булмый. Хатирәләр бөтен алдагы тормышны астын өскә китерергә, килә­чәк буыннарга да йогынты ясарга мөмкин.

Бу көннең төп максаты –─ террорчылык корбаннарын искә алу һәм исән калганнарга үз хокукларын якларга һәм нормаль тормышка кайтырга ярдәм итү. Террорчылыктан теге яки бу дәрәҗәдә барлык дәүләт­ләр дә зыян күрә. Австра­лиянең Икътисад һәм тынычлык институты мәгълү­матлары буенча, былтыр җирдә 6,7 мең кешенең гомерен өзгән 3,9 меңнән артык теракт теркәлгән.

Русиядә террорчылык корбан­нарының хокуклары “Террорчылыкка каршы тору турында” федераль закон белән яклана. Закон теракт нәтиҗәсендә ките­рел­гән әхлакый һәм матди зыянны компенсацияләүне күздә тота. Ул җинаять­ченең һәм аның якын туганнарының милке исә­бенә башкарыла. Шул ук вакытта зыянны кап­лау өчен теләсә кайсы вакытта мөрәҗәгать итәргә мөмкин — мондый дәгъва вакыт белән чикләнми. Террорчылык актына чик кую барышында китерелгән зыян дәүләт тарафыннан компен­сацияләнә.
Закон шулай ук террорчылык корбаннарын һәм җинаятьчеләр белән көрәш­тә зыян күргән кеше­ләрне социаль реабили­тацияләү­не күздә тота. Ул медицина һәм психологик, хокукый ярдәмне, эшкә урнашканда ярдәм итүне, торак бирүне үз эченә ала. Кирәкле акчалар федераль бюджеттан һәм теракт булган субъект бюджетыннан бүленә.

Террорчылыкка каршы көрәштә катнашучы хәрби хезмәт­кәрләргә, Тикшерү комитеты хезмәткәр­ләренә, терактларны туктатуда һәм җина­ятьчеләрне тотуда ярдәм итүче кеше­ләр­гә дә ярдәм күрсәтелә. Ярдәм санап үтелгән барлык категория граж­даннарның гаилә әгъзаларына да кагыла.

Безнең һәр­­бере­без бу афәткә каршы торуга үз өлешен кертә ала. Бу террорчылык корбаннарына һәм аларның гаиләләренә ярдәм итү, террорчылык проблемасы турында мәгъ­лүмат тарату, җинаять­челекне һәм экстремизмны гаепләү, тынычлык һәм толерантлыкны пропагандалауга юнәлтелгән чараларда актив катнашу булырга мөмкин.

Халыкара террорчылык корбаннарын искә алу көне –─ ул хәвефсез һәм гадел дөнья булдыруга үз өле­шеңне кертү мөмкин­леге. Ул ничәнче тапкыр безгә террор­чылыкның чик­ләрне белмәве һәм безнең һәрбе­ребезгә кагылуы турында искә төшерә. Әл­бәттә, бу көн бик зур әһә­мияткә ия, чөнки ул бөтен милләт­ләрнең дөнья­күләм яшәе­шенә кагылышлы җитди проблемага игътибарны җәлеп итүгә юнәл­телгән.

Сүз уңаеннан, Русиядә Террорчылыкка каршы көрәштә теләктәшлек көне дә билгеләп үтелә. Ул федераль закон белән 3 сентябрьгә билгеләнгән. Мәгълүм булуынча, 2004 елның 3 сентяб­рендә террорчылар Бесландагы мәк­тәпкә һөҗүм итте. Әлеге көн шушы коточкыч фаҗига корбаннары хакында якты хәтерне саклау максатында булдырылган.