Игорь Комаров Русия Герое бүләген тапшырды

Полковник Андрей Колпаков СВО зонасында күрсәткән батырлыгы һәм кыюлыгы өчен үлгәннән соң «Русия Герое» исеме белән бүләкләнде. Сентябрьдә, дошманның терәк пунктын тар-мар итеп, аның командованиесендәге төркем оборона сызыгын өзүне булдырмый калды, ләкин җавап итеп ракета һөҗүме алды. Андрей Колпаков иптәшләрен окопка төшергән, үз гәүдәсе белән ике егетне каплаган һәм аларны үз гомере бәясенә коткарган.

- Һәрбер солдат һәм офицерның тормышында батырлык вакыты килеп җитәргә мөмкин. Гаилә, Ватан, сугышчан иптәшләр һәм тыныч тормышта яшәүче гражданнар өчен. Сезнең ирегез, улыгыз һәм әтиегез кебек офицерлар - хәзер сафта һәм алгы сызыкта булган һәркем өчен намус, профессионализм һәм батырлык үрнәге. Һәрвакыт шулай булды һәм булачак та. Хәрби бурычын үтәгәндә күрсәткән батырлыгы һәм фидакарьлеге өчен Русия Федерациясе Президенты Указы белән полковник Колпаков Андрей Валерьевичка Русия Федерациясе Герое исеме бирелде, – диде Игорь Комаров, бүләкне тапшырганда.

Башкортстанны геройларның ватаны дип тулы хокук белән атарга мөмкин. Бүгенге көндә Башкортстаннан махсус хәрби операциядә катнашучы 12 кеше югары дәүләт бүләгенә лаек булды. Төбәк Башлыгы Радий Хәбиров сөйләгәнчә, геройларның исемнәре илебез һәм республикабыз тарихына мәңгелеккә язылган.

- Без махсус хәрби операция барышында батырлык күрсәткән егетләребезне һәрвакыт истә тотачакбыз. Бу - уфалы Максим Серафимов, гранатаны үз гәүдәсе белән каплап, егетләрне үлемнән коткарган. Бу - Әбҗәлил районыннан дошман утын үзенә алган Тамерлан Илһамов. Бу - Яңавыл районыннан Игорь Насыйбуллин, ул танкта яралы сугышчыларның эвакуациясен каплаган. Бу - Әлшәй районыннан Алмаз Сафин, разведчикларның парашют-десант взводы командиры, дошманны иң мөһим рубежларның берсендә чигенергә мәҗбүр иткән. Алар барысы да Русиянең югары бүләген үлгәннән соң алды.

Бу - Бөре районыннан Борис Дудко. Аның командалыгындагы танк ротасы дошманның ныгытылган районын алды, шәхси экипаж 7 танкны, күпсанлы пехотаны юк итте. Бу - Октябрьскийдан Степан Белов. Узган ел гына да аның командалыгындагы танк ротасы дошманның 20 танкын, 9 сугышчан пехота машинасын һәм күпсанлы тере көчен юк итте. Бу - Уфадан Денис Чернавин, аерым вертолет полкы командиры. Аның исәбендә - 400дән артык хәрби очыш. Ул дошманның 82 берәмлек бронялы техникасын, ике меңнән артык боевигын юк итте, - дип билгеләде Радий Хәбиров.

Фото: bashinform.ru