Туган як җылысы да салынган

Башкортстан Хөкүмәте Премьер-министры урынбасары Ирек Сәгыйтов йөк төялгән конвойларны оештыруда һәм озатып йөрүдә катнашучыларның барысына да рәхмәт белдерде.

– Без даими рәвештә иң кирәкле әйберләрне җибәрәбез, гуманитар ярдәм күрсәтәбез, социаль-көнкүреш мәсьәләләрен оператив хәл итәбез һәм алга таба да бу беренчел бурычны үтәячәкбез. Олауларны оештыруда һәм озатып йөрүдә катнашучыларның барысына да рәхмәт белдерәм. Без бергәләп җиңүебезне якынайтабыз, – диде Ирек Сәгыйтов.

“Бердәм Русия” партиясенең төбәк Башкарма комитеты җитәкчесе Руслан Насретдинов посылкаларның Башкортстанда яшәүчеләр, Миңнегали Шәйморатов исемендәге штаб волонтерлары, иҗтимагый оешмалар һәм предприятиеләр тарафыннан җыелуын билгеләп үтте.

– Ватанны саклаучылар көне алдыннан сугышчыларыбызга өйләреннән җылы сәлам тапшырабыз. Посылкаларда барлык кирәкле әйберләр бар, ә иң мөһиме – бүген илебез сагында торучыларга ихлас ярдәм һәм рәхмәт сүзләре, – дип билгеләп үтте ул.

Йөк махсус хәрби операциядә катнашучы 20 хәрби подразделениегә билгеләнгән. Аңа 19 автомобиль, чылбырлы, күпмаксатлы транспортер-тягач, 105 кубометр агач материалы, 700 FPV-дрон, 2 квадроцикл, мотоцикл, 5 мобиль мунча, маскировка челтәрләре, бензопычкылар, генераторлар, автомобильләр өчен запас частьләр, окоп шәмнәре, буржуйка мичләре, газ баллоннары, төзелеш кораллары һәм материаллар, шәхси гигиена чаралары, азык-төлек, медикаментлар һәм газизләреннән туган як сәламнәре язылган хатлар да салынган посылкалар кергән.

Фото: "Башинформ"