18 яшендә алгы сызыкка киткән

Дарья Грицаенкога карап, аның махсус хәрби операциядә катнашканын күз алдына да китерүе кыен. Сөйкемле кыз 18 яшендә, туган көненнән бер атна үткәч, алгы сызыкка китә. «Вишня» позывнойлы яшь сугышчы «БАРС-6» ирекле отряды составында ярты елдан артык хезмәт итә. Ул алгы сызыкта чын сугышны күрә, яралы хәрбиләрне коткара һәм аларга беренче медицина ярдәме күрсәтә.

Бүген «Яшьләр көне - 2026» фестивалендә Башкортстан Башлыгы Радий Хәбиров Дарья Грицаенкога алгы сызыкта күрсәткән батырлыгы өчен Башкортстан Башлыгының «Башкортостан ирекмәне» мактау билгесен тапшырды.

Уфа районының Красный Яр авылында туып-үскән Дарья шундагы мәктәпне тәмамлаган. 2024 елда ул Башкорт кооператив техникумына «банк эше» юнәлеше буенча укырга керә. Әмма беренче курсны тәмамламыйча, махсус хәрби операциягә китәргә карар кыла.

- Узган ел язын мин махсус хәрби операция зонасына гуманитар конвойны озата бардым. Сөйләшүләр вакытында сугышчылардан алгы сызыкта беренче медицина ярдәме күрсәтә алырдай кешеләр җитмәве турында ишеттем. Өйгә кайткач, «БАРС-6» командиры белән элемтәгә кердем һәм Русия Оборона министрлыгы белән контракт төзергә карар кылдым. Аннан соң Санкт-Петербургка киттем, үз хисабыма Ratmed тактик медицина академиясендә белем алдым. Ике атна эчендә автомат, пулемет һәм снайпер винтовкасын кулланырга өйрәндем, «санитар-укчы» белгечлеген үзләштердем, — дип сөйли Дарья.