Фенол гына җитмәгән иде!..

Уфада экология буенча иң проблемалы зур территория бар.

Элекке «Химпром» заводы мәйданчыгында кар суларын чистартуга әзерләү һәм җибәрү эшләре башкарылды. Бу хакта башкала хакимиятендә узган оператив киңәшмәдә «Защита «Спеццентр" предприятисе җитәкчесе Закир Гыйләҗев хәбәр итте. Муниципаль предприятие чистарту корылмалары операторы булып тора, ә завод 2010 елда бөлгенлеккә төште, 2013 елда «Химпром» чистарту корылмалары шәһәр балансына тапшырылды.

Агымдагы язда «Фенол һәлакәте"нә 30 ел тула - 1990 елда туфракка 90 кубометрга якын зарарлы матдә агып чыккан иде. Пычрануның гомум мәйданы - 143 гектарга якын, аннан җыелган химикатлар шлам җыйгыч сигез контейнерда саклана. Территорияне рекультивацияләү өчен берничә миллиард сум акча кирәк, хөкүмәт акчаның төп өлешен федераль бюджеттан алырга өметләнә.

Чистарту корылмаларының мәйданы - 42 гектар, агынтылар җыю мәйданы - 102 гектар, кар сулары 4,5 километр озынлыктагы торбаүткәргеч буенча «Башнефть» станциясенә җибәрелә.

Закир Гыйләҗев ышандыруынча, торбаүткәргечләрне, каналларны, ком тоткычларны һәм канализацияне чистарту, шулай ук насосларны ремонтлау башкарылган. Язгы ташу вакытында махсус үзәк хезмәткәрләре тәүлек буе эшләячәк, су пробалары аналитик контроль үзәгенә җибәреләчәк.

Фото: bashinform.ru