Музыкага мәхәббәт тәрбияли

Нәрсә ул талант? Ходайдан бирелгән сәләт, дияр берәүләр. Икенчеләре исә, аны үстермәсәң, юкка чыгарга мөмкинлеген дә әйтер. Чыннан да, боларның һәркайсы белән килешергә мөмкин, әмма өстәп тагын шуны әйтәсе килә, талант ул — тәрбия дә. Әйе, популяр сәхнә йолдызларының гына биографиясен алсак та, аларның күбесе балачагында әти-әниләре­нең үзләрен җитәкләп сәхнәгә чыгаруын, төрле түгәрәкләргә йөртүләрен, ниндидер чыгышлар уңышсыз килеп чыкканда аларның юатырлык сүз таба алганнарын сөйли. Чыннан да, талантны үстерү өчен зур тырышлык таләп ителә.

Стәрлебаш районы үзәгендә эшләүче Зөфәр Атангулов та балачагын искә алганда әти-әни­сенең бик талантлы булуларын ассызыклый.
— Мин Федоровка райо­нының Олы Чытырман авылында дөнья­га кил­гән­мен. Андагы мәк­тәп­нең 9нчы сыйныфын тәмамлагач, Салават шә­һәрендәге музыка училищесына укырга кердем. Шул ук вакытта мәктәптә дә белем алуымны дәвам иттем. 4 ел “башкорт халык хоры” юнәлеше буенча белем алганнан соң, Уфада сән­гать академия­сенең әзерлек бүле­гендә укуымны дәвам иттем, — дип искә ала Зөфәр үзенең сәх-нәгә юл башын.
Кызганычка каршы, егеткә ул вакытта академиягә укырга керер­гә насыйп булмый. Имтихан­нар бик катлаулы була, укырга керергә теләүчеләр дә бихисап. Шул рә-вешле ул сынауларны үтә алмый.
Тик бу сәхнә кешесен туктата аламы соң?! Зөфәр ике дә уйламый, Федоровка район мәдәният сараена эшкә кайта. Армиядә хезмәт итә. Аннан кайткач, егеткә бераз башка тармакта эш­ләр­гә туры килә.
— Мин сәнгатькә гашыйк ке­шеләр гаиләсендә тәрбия­лән­дем. Әнием туган авылымда 30 ел клуб мөдире булып эшләде. Ул бик матур җырлый, гармунда уйный. Әтием дә баянда уйный, җыр­лый. Гомумән, ике яктан да нәселебездә музыка яраталар. Картәтиемнең әтисе данлыклы курайчы булган. Шуңа да бу сәләт бездә буыннан-буынга күчеп килә.
Зөфәр Стәрлебаш район мәдә­ният сараенда әле бер ел гына эш­ләсә дә, аның инде үз тамашачысы бар.
“Арбаның алгы тәгәрмәче кайдан тәгәрәсә, арткысы да шуннан бара”, ди халык. Зөфәр тормыш иптәше белән өч кызга гомер бүләк иткән.
— Ике кызыбыз әле балалар бакчасына гына йөри. Шулай булуга карамастан, музыка ишетсә­ләр, шунда ук җырлый башлый-лар. Өлкән кызыбыз 9нчы сыйныфта белем ала, — ди яшь әти.
Бүген Зөфәр Мөнәвир улы Уфа сәнгать институтында читтән торып 3нче курста укый. Биредә, башлыча, курайда уйнауга басым ясалса да, Зөфәр буш вакытында гармунда, фортепианода да уйный.
Былтыр, Сибайда үткән “Ирән­дек моңнары” конкурсында катнашып, өченче урын яулаган. 2018 елда Мәләвездә Тәнзилә Үзән­баева призына оештырыл­ган конкурста, Стәрле­тамак районында үткән “Ка­һым­түрә кунакка чакыра” бәй-гесендә Гран-при яулаган.
— Конкурсларда күп тапкырлар җиңүче булдым. Мин күбрәк халык җыр­ларын, көйләрен башкарырга яратам. Алдан әй­түем­чә, әтием шушы көй­ләрне уйный иде, күңелемә сеңеп калгандыр. Аларны башкару зур осталык та­ләп итә, шулай да күңелгә нәкъ шушы көйләр якын булгач, миңа бу һич авырлык тудырмый, — ди Зөфәр.
Чыннан да, бүген Зөфәр Стәр­лебаш районы тамашачысын үзенең җыр-моңнары белән сөен­дерә. Нинди генә чара үтсә дә, халык аның чыгышын түзем-сезлек белән көтеп ала.
— Пандемия башлангач, безнең тармак эшчәнлеге зур үзгәрешләр кичерде. Онлайн форматта чыгыш ясыйбыз. Әм­ма бу тамашачы белән күзгә-күз карап аралашудан бик ерак. Чыгышларым вакытында алар­ның миңа кушылып җырлавын ишетү, аларның күзләрендә шушы җырга мәхәббәт күрү мине тагын да югарырак баскычка күтәрә, чыгышымны җанлы итә. Инде бу афәттән котылып, тизрәк гадә­ти тормышка кайтырга өметләнәбез, — ди ул.
Урындагы халык өчен Зөфәр яраткан башкаручы булса, тормыш иптәше өчен – терәк булырлык ир, балалары өчен сөекле әти дә ул.
— Җырны онытып булмый бит ул. Өйдә нинди генә эшкә алынсам да, эчтән генә көйләп йөрим. Шул рәвешле эшемне төгәллә­вемне сизми дә калам. Кызлар бе­­лән дә кичләрен бергәләп җырлыйбыз. Аларга бишек җыр­ларын да үзем җыр­ладым, — ди ул.
Әйе, берәүләр өчен сәнгать — эш булса, икенчеләр өчен ул яшәү рәвеше дә. Гадәттә, аны яшәү мәгънәсе итеп кабул иткән, бар күңеле белән аңа хезмәт итүчеләр уңышка ирешә. Моны яшь талант иясе Зөфәр Атан­гулов та исбатлый. Кыска вакыт эчендә зур уңышларга ирешүендә аның сәнгатькә булган мәхәббәте төп рольне уйный. Киләчәктә дә аңа әлеге юнәлештән тайпылмый, яңадан-яңа үрләр яулавын телибез.

Гөлия Гәрәева.
Стәрлебаш районы.