Шәйморатов эзләре буйлап...

Луганск Халык Республикасы делегациясе Башкортстанга эшлекле сәфәре чикләрендә Миңнегали Шәйморатовның туган ягында – Кырмыскалы районының Шәйморатов авылында булып китте.
Ерактан килгән кунаклар иң тәүдә легендар дивизия командирының һәйкәленә чәчәкләр салды, аннары Шәйморатов күпфункцияле авыл мәдәният йортына юлланды: биредә Луганск Халык Республикасы кунакларына районда уңышлы эшләп килгән М. Шәйморатов исемендәге “Йолдыз” хәрби-патриотик клубы тарафыннан “Хәтер вахтасы” чикләрендә агымдагы елда Ленинград өлкәсендә табылган экспонатлардан күргәзмә тәкъдим ителде.
Клуб җитәкчесе Зәки Бикбаев районда оештырылган эзләнү отядлары, хәрби-патриотик клублар һәм “Яшь армияче” хәрәкәтенең эшчәнлеге турында да сөйләде.
Шулай ук 112нче Башкорт кавалерия дивизиясе һәм аның легендар командиры М. Шәйморатовның хәрби юлын чагылдырган 3-D маппинг форматындагы фильмны да кунаклар зур кызыксыну белән карады.
Туган якны өйрәнүче Резида Әхтәмова – Миңнегали Шәйморатовка туган тиешле кеше. Шуңа да ул данлыклы якташыбызның тормыш юлын өйрәнү буенча бик зур эш башкара. 112нче Башкорт кавалерия дивизиясендә хезмәт иткән якташ-яугирләрнең исемлеген төзүгә дә зур өлеш кертте. Ә бу көнне ул кунакларга Миңнегали Минһаҗ улының балачагы һәм үсмер еллары турында кызыклы мәгълүматларны җиткерде. Авылдашлары кечкенә Миңнегалине Миннуш дип йөрткән. Малайның атларга булган сөюе дә әнә шул балачагыннан килә: яшьтәшләре белән ул күпчелек вакытын шулар янында үткәргән. Гармунда уйнарга да бәләкәйдән өйрәнгән, ә аннары яраткан уен коралын үзе белән сугышка алып киткән. Бу һәм башка бик кызыклы мәгълүматларны кунаклар ихлас тыңлады һәм легендар командирны Луганск Халык Республикасында да ихтирам итүләрен билгеләп үттеләр.
- Тарихны үзгәртергә һәм бозарга беркемнең дә хакы юк. Киләчәктә дә ике республика арасында дуслык җепләре ныгыр, аның хакында истәлек буыннан-буынга тапшырыла килер, - дигән ышанычын белдерде Луганск Халык Республикасының Халык советы депутаты Сергей Серов.

Фото: Эльвира Ямалетдинова.