“Бердәм булганда, яхшырак булдырабыз!”

– Бүген, мәгълүмат алу чыганаклары, аеруча интернет челтәре киң мәгълү­мат­лы заманда, кәгазь басма­ларның бәясе һәм роле бер­аз кими барган кебек, – ди бу хакта “Башкортостан” гә­зитенең баш мөхәррире Вә­дүт Исхаков. – Әмма, шөкер, басма сүзнең аерым бер кодрәтен тойган, кулына чын гәзитне тотып укудан шатлык тапкан укучыларыбызның булуы, безнең тиражның тотрыклы булуы эшебезгә дәрт, ышаныч өсти. Шул ук вакытта заман белән бергә, хәтта аннан бераз алда атларга да тырышабыз. Моңа соңгы елларда “Башкортостан” гә­зитенең Интернет киңлек­лә­рен яулавы, сайт һәм социаль челтәрләрдәге төркем­нәребезнең активлыгы, ауди­ториябезнең арта баруы ныклы дәлил. Бу эшчәнлегебез белән без Интернетта башкорт телендә әйбәт контент булдыруга, туган телебезне саклауга һәм киңрәк танытуга да зур өлеш кертәбез.

Шушы көннәрдә “Торатау” Конгресс-холлында узган “Медиаиндустрия һәм яңа шартлардагы журналистика” темасына багышланган “Ме­диаҗыен” форумында каләм­дәшләребезнең эшчәнлеге югары бәяләнде һәм гәзит­нең баш мөхәррире Вәдүт Гайфулла улына “Башкортстан Республикасының атказанган матбугат һәм киңкү­ләм мәгълүмат хезмәт­кәре” дигән мактаулы исем бирелде. Аны югары исем бирелү уңаеннан ихлас тәбриклибез! Ул, әл­бәт­тә, бу мәртәбәне хезмәт­тәшләре белән дә уртаклаша. Ә кемнәр соң алар? Без гәзитнең социаль мәсьәләләр бүлеге мөдире, Башкорт­стан­ның атказанган матбугат һәм киңкүләм мәгълүмат хезмәт­кәре Гүзәлия Балтабаевадан коллектив белән якыннан таныштыруны үтендек.

– “Кызыл таң” гәзите – без­нең Матбугат йортындагы ут күршебез генә түгел, фикердәшебез дә. Сер түгел, күп очракта безнең аудиториябез дә бер. Шуңа да “Кызыл таң” укучыларын “Башкортостан” гәзите хезмәт­кәр­ләре белән якыннан таныштыру безгә аеруча мөһим.
Гамәлдә, мөхәрририят кыска гына хәбәрдән алып төпле аналитик мәкәләгә, киң колачлы очеркка, җанлы интервьюга кадәр – барча жанрда кызык материаллар әзерли, теге яки бу чараларны яктырта, укучы белән бергә борчыла, шатлана, сорауларга җавап эзли.

2018 елдан “Башкортостан” гәзитенә билгеле педагог, журналист, матбугат һәм җәмәгать эшлеклесе Вәдүт Гайфулла улы Исхаков җитәкчелек итә. Шулай ук, ул 2020 елның декабреннән – Башкортстан Журналист­лар берлеге рәисе дә. Аның урынбасарлары – үткен каләмле журналистлар Миң­зифа Илтенбаева, Гөлдәр Биргәнова-Бәүләкбаева, Алсу Әһлиуллина, Рәшит Зәй­нуллин – еллар дәва­мында безнең басма белән бергә үскән, камилләшкән каләм осталары; оештыру, коллективны бергә туплау кебек җаваплы эшне башкарган белгечләр. Бу исемлектән иң тәҗрибәле һәм озак еллар редакциядә эшләгән Миңзи­фа Абрар кызын аерым билгеләп үтәсе килә. Кайчандыр Башкорт дәүләт университетын тә­мам­лап килгән яшь белгеч хезмәт юлын гади корректор булып башлаган, журналист осталыгын төрле бүлекләрдә камил­ләштергән, ә соңгы берничә дистә елда ул бас­маның җаваплы секретаре вазыйфасын башкара. Миң­зифа Илтенбаева – искиткеч та­ләп­чән, төпле белемле, сүз бәһасен һәм куәтен һө­нәри яктан нечкә тойган белгеч һәм оста оештыручы да: ташка басыласы һәр язма аның тәҗрибәле кулларыннан үтә, аның ярдәмендә камилләшә һәм укучысына барып җитә.

Гомумән, гәзитнең стилен, юнәлешен, йөзен билгеләгән тотрыклы журналистлар берлеге күптән тупланган “Башкортстан”да: Динә Арсланова, Гөлдәр Якшыгулова, Гүзәлия Балтабаева, Илдар Акъюлов, Лилия Нуретдинова, Әлфия Әюпова, Рамилә Мусина, Дилбәр Ишморатова, Айсылу Низамова, Тәнзи­лә Дәүләтбирдина, Кәримә Усманова, Равилә Гатауллина, Римма Солтанова, Рә­мил Мансуров, Резеда Әх­мәтгәрәева – аларның һәм­мәсенең исеме басма укучыларына яхшы таныш, һәммә­сенең үз укучысы, фикер­дә­ше бар республикада. “Башкортостан” журналист­лары­ның янә бер үзенчәлеге – ул да булса универсальлек. Телгә алган һәр каләм остасы, заман таләпләренә ярашлы, үткен фикерле әңгәмәче дә, кеч­кенә мәгълүматтан алып, төпле мәкалә язган журналист та, урыс һәм татар теле үзенчәлекләреннән хәбәрдар тәрҗемәче дә. Әйе, басма битендә дөнья күргән барлык рәсми материалларны югары осталык белән тәрҗемә итүче Лилия Дәүләтбәкованы да атап үтү кирәк. Ул басма­бызның рәсми йөзен билгели, республикадагы иң тәҗ­рибәле тәрҗемәчеләрнең берсе дигән даны да бар.

Гомумән, гәзит чыгару – күмәк хезмәт. Журналист­ларның язмаларыннан тыш, редакциягә төрле проблемаларны чагылдырган, хатлар да еш килә. Аларны да эш­кәртеп, төзәтеп, мөхәр­рир­ләп, укучысына җиткерергә кирәк. Бу җәһәттән, журналистларга хәреф җыю осталары Саҗидә Гыйльметдинова һәм Миңсылу Рәхмә­туллина һәрчак ярдәмгә килергә әзер.

Басманың техник йөзен билгеләүче белгечләр исә компьютерда версткалау бүлегендә эшли: инженерлар Ирек Галиев, Азат Заһитов, Рисәлә Йомагулова – дистә­ләрчә еллар гәзитне формалаштырган, версткалау сер­ләренең бар нечкәлегеннән хәбәрдар һөнәр осталары. Корректорлар Зөлфия Сә­гый­това, Әкълимә Рәхмә­това, Миләүшә Сәйтәкова да – басмабызда күптән хезмәт салучы, эшнең бар үзенчә-лекләренә төшенгән, белемле белгеч­ләр.
Реклама һәм басмага язы­­лу бүлеге белгечләре Гөл­симә Салихова, Гөлсирә Сәхиева редакциянең матди бөтенлеге, басмага язылуны оештыру өчен җавап бирә. Алар да – басмабызда озак еллар эшләгән һөнәр осталары, заман таләпләре бе­лән бергә атлаган белгечләр.

Шулай, гәзит чыгару – кү­мәк эш дибез. Бездә дә, “Башкортостан”да да моның өчен көчле коллектив туп­ланган. Тагын шунысы бар, ут күршеләр буларак, без һәрвакыт бер-беребезгә яр­дәм итәргә әзер. Еш кына блокнот, каләмен тоткан журналистларның Матбугат йортының алтынчы катыннан бишенчегә төшеп барганын, яисә, аннан менеп килгәнен күрерсез. Бу – без булырбыз! Телефоннарыбызда да ике редакция хезмәткәрләре саннары саклана. Бу да күмәк, бердәм хезмәт билгесе. Ка­ләмдәшләрне гәзитнең күр­кәм яше белән котлыйбыз. Без булдырабыз! Бергә исә тагы да яхшырак булдырабыз!

Резида ВӘЛИТОВА.