Күпереп пешә икмәге, өелеп тора чәкчәге

Предприятиене Надежда Дәүләтова җитәкли. Бүгенге көндә кондитер, “Әбием серләре”, пилмән, туңдыру цехлары тулы куәтенә эшли. Тәүлегенә 2 тонна он, 20 килограмм ит эшкәртелә, 15 килограмм камыр ризыклары әзерләнә.
Күпереп пешкән икмәк Шаранның барлык кибетләренә, Туймазы шәһәре һәм районына, Октябрьскийга сатуга озатыла.
— Учреждение, кибетләр безнең икмәккә өстенлек бирә. Чөнки, азык-төлеккә бәяләр артса да, без хакны күтәрмәдек, көндәш­лекне тотарга тырышабыз. Икмәк, беренчедән, арзан булса, икенчедән, бик тәмле. Дәүәниләребезнең рецептларын кулланып эшлибез. Әлбәттә, озак процесс, ләкин үзен аклый, тәмле дә була, файдалы матдәләре күп, озак саклана, — ди Надежда Морзагәрәй кызы.
Традицияләрне саклап, технологияләрне бозмый пеше­рү — биредә иң мөһиме. Уңыш­ның сере шунда. Традицияләр дигәннән, пекарня дистә елдан артык эшли. Җитештерелгән продукция шаранлыларга яхшы таныш. Күргәзмә, ярмин­кәләрдә дә Шаран икмәген эзләп таба даими сатып алучылар. Исеме җисемен аклау бер шатлык булса, кадрлар алмашынмавы белән икенче яклап ота җитәкче.
— Икмәк пешерүчеләр, кондитерларыбыз менә инде озак еллар һөнәренә тугры кала. Хезмәттән ямь табып, тырышып эшлиләр. Эш хакы яхшы, аны түләүдә тоткарлык юк. Алар да, җитәкчелек тә бик канәгатьбез, — ди Надежда Дәүләтова.
Бүген биредә 35 кеше эшли. Эш өчен уңайлы шартлар тудырылган. Шунысы да игътибарга лаек: колмакны көзен бер елга җитәрлек итеп үзләре әзерли икән.