“Һәр сәгатең файдалы үтсен!”

Сәгать 8.00. Рәшит Дәүләтов иртәнге матбугат басмаларын карап чыкты. Өстәлдәге берничә до­кументның эчтәле­ге белән танышты, аларда күтәрелгән мәсьәлә­ләр­не хәл итү өчен кайдадыр шалтыратты.

Сәгать 8.30. Планерка башланды. Шәһәр Советы рәисе, полиция, хакимият­нең финанс, мәдәният, мәга­риф идарәләре, хәрби комиссариат, Гадәттән тыш хәлләр министрлыгы Баш идарәсе, Пенсия фонды, халыкны социаль яклау, эш белән тәэмин итү, архитектура бүлек­ләре, салым инспекциясе җитәкчеләре, үзәк дәваханә баш табибы, шәһәрнең Энергетик, Ташкиново, Кәчәү микрорайоннары башлыклары, хакимият баш­лыгы урынбасарлары узган атнага отчет тотты, алдагысында башкарылачак эшләр белән таныштырды. Хакимият башлыгының игътибарыннан бер нәрсә дә читтә калмый: су басу куркынычы янаган төбәкләрдәге хәл, янгыннар ешаеп китү сәбәпле, аларны кисәтү максатында башкарылган эшләр, Җиңү бәйрәменә әзерлек, дәваханәләрдәге хәл, кибетләрдә хаклар арту, салымнар керү, армиягә язгы чакырылыш – барысы турында да бәйнә-бәйнә сорашты. Мәгариф бүлеге 1 майдан шәһәрдә балалар бакчаларына хаклар артачагы турында хәбәр итте. Моның сәбәпләрен, урындагы матбугат, телевидение аша халыкка аңлатырга кирәк, дип басым ясый Рәшит Мостафа улы.