“Кызыл әтәч” кунганны көтмә!

— Янгын белән көрәшүдән тыш, аны кисәтү мөһим, — диде Павел Александрович. — Күп кенә очракларда күңел­сез хәлләргә нәкъ игътибарсызлык, битарафлык сәбәпче. Әйтик, эчкечеләрнең тәмәке тарткан җирдән йоклап китүе­нең ничек тәмамланасын сөй­лисе дә юк. Көндәлек кулланыштагы электр җиһаз­ларын сакчыл файдалану да мөһим. Көчле җил көнне учак ягып, шашлык кыздырырга теләүче­ләр­не дә аңлавы кыен. Мондый күренешләр белән көрәш­тә аңлату эшенә зур игътибар бүләбез.

Мәгълүм булуынча, Иглин районында бик күп бакчачылар ширкәтләре урнашкан. Павел Александрович сөйләвенчә, кайберәүләр бакча йортларында кышын да яши һәм Уфага эшкә йөри. Әлбәттә, кышын йортларны җылыту өчен электр җиһазлары, үз куллары белән ясалган мичләр эшкә җигелә. Күңелсез хәлләрне кисәтү максатында ягып җы­лыту чоры башланыр алдыннан “Торак”, “Уңыш” һәм башка акцияләр оештырыла. Яңа уку елы башланганчы мәгариф учреждениеләрендә аңлату эшләре алып барылган. Беренче сентябрьдә район мәк­тәпләрендә балалар янгын хәвефсезлеге темасына фә­һем­ле мәгълүмат тыңлаган. Шул ук вакытта, тиешле мәгъ­лү­матны халыкка мавыктыргыч ысуллар белән җиткерүгә дә игътибар бүленә.

— Ачык ишекләр көнендә балалар янгын сүндергеч техника мөмкинлекләре белән якыннан таныша ала, — дип сүзен дәвам итте әңгә­мәдә­шем. — Мондый гамәли дәрес­ләр укучылар күңелендә нык истә кала. Урындагы үзидарә белән берлек­тә халык арасында аң­лату эшлә­ре алып барабыз, халык җыенна­рын­да чыгыш ясыйбыз. Кыскасы, халык имин, тыныч тормышта яшәсен өчен кулдан килгәннең барысын да эшләргә тырышабыз. “Кызыл әтәч”-не һәркем игътибарлы булганда гына йөгәнләп була. Моны үсеп килүче буын да, өлкәннәр дә аңласын иде.

79нчы янгын сүн­де­рү частенда 30 кеше эшли. Частьны Фәиз Шәймәр­да­нов җитәк­ли. Өч махсус машина һәрвакыт сафта. Моннан тыш, Урман авылында янгын сүн­дерү часте бар. Район аша М-5 федераль трассасы, тимер юлы үтүе, бакчачылар шир­кәтләренең күп булуы янгын сүндерүчеләрдән һәрдаим уяулык таләп итә.