Ветераннар — безнең горурлыгыбыз!

Уфа шәһәренең ЮХХДИ ветераннар оешмасы тарихы аның әгъ­за­ларының яшь хезмәткәрләр тәрбия­ләүдә, коллективларны туплауда нинди мөһим роль уйнаганнарын ачык чагылдыра. Шунысы куанычлы, әлеге кешеләр, хаклы ялга китсәләр дә, хезмәт­тәшләре белән элемтәне өзмичә, бүлекчәләр­нең иҗтимагый тормышында актив катнашалар, аларга алмашка килү­челәрнең һөнәри яктан үсүенә ярдәм итәләр.

Уфа шәһәренең Эчке эшләр идарәсе ветераннар оешмасы, утыз хезмәткәрне берләш­тереп, 1969 елда барлыкка килә. Шул вакыттан алып аларның данлы эш­ләренең тарихы башлана.

Элекке коллегалар шатланып тантаналы чараларда җыелышалар, намус белән үтәлгән бурыч өчен рәхмәт йөзеннән котлауларга һәм бүләкләргә лаек булалар. Болар исә ветераннарга үзлә­ренең кирәклеген, бүгенге вакыйгаларга һәм эшләргә катнашлыкларын тоярга ярдәм итә.

Ул вакытта һәм хәзер ветераннар оешмасы, мөм­кинлек­ләренә карап, пен­сионерларның һәм хезмәт вазыйфаларын үтәгәндә һәлак бул­ган хезмәт­кәр­ләр гаиләлә­ренең яшәеш проблемаларын да хәл итә. Алар һәрвакыт Уфа шәһәре ЮХХДИ җитәк­челегеннән аңлау таба һәм матди ярдәм ала.

1974 елда ветераннар оешмасында ЮХХДИ һәм юл-патруль пол­кының йөзгә якын элекке хезмәткәре бар иде инде. Шул рәвешле, Дәүләт автоинспек­циясенең Уфа “пенсионерлар ротасы” тулысынча тупланды.

Еллар үтү, икътисади шарт­лар үзгәрү ветераннар җәмгыяте структу­расының яңаруын, эшнең яңа форма һәм юнәлешләрен кертүне, аның әгъзаларының активлыгы артуын таләп итте.

Оешманың рәисе, отставкадагы милиция майоры Владимир Богданов һәм аның якын көрәштәшләре яңа оешманың уставын, рәсми документларын эшләделәр. Владимир Егорович яңадан сайланган ЮХХДИ ветераннары советын җитәкләде һәм җиде ел дәвамында оешманың барлык эшләрен үрнәкле алып барды. Алар исәбендә күп­санлы изге эшләр, йөзләрчә рәхмәт сүзләре, мох­таҗларга ярдәм итүнең меңнәрчә мисалы.

Бүгенге көндә Русия Эчке эшләр министрлыгының Уфа шәһәре буенча ЮХХДИ бүлегенә Илнур Зәфир улы Садыйков җитәкчелек итә. Хезмәтенең беренче көненнән үк ул ГАИ-ЮХХДИ хезмәте ветеран­нарының проблемалары белән кызыксына башлады, алар турында бәйрәмдә дә, гадәти көннәрдә дә онытмый. Һәрчак вакыт таба, һәркемне кабул итә һәм тыңлый.

Ветераннар үзләре турында хәстәрлек күргәннәре өчен рәхмәтлеләр һәм ЮХХДИның бүгенге хезмәткәрләренә хәл­ләреннән килгәнчә сүз белән дә, эш белән дә ярдәм итәргә тырыша.

Ветераннар төрле чараларда катнашалар, укучыларны юл хәрәкәте кагыйдәләренә бик теләп өйрәтәләр, Уфа шәһәренең ДПС полкы музеенда экскурсияләр үткәрәләр. Әйтергә кирәк, музей экс­понатларының сакланылышы өчен ДАИ ветераны З. Г. Мосунова һәрвакыт җаваплы булды. Әлеге искиткеч ханым яшь чагыннан ир-ат коллегаларыннан калышмыйча, җи­ңел булмаган эш башкарды: Уфа урамнарында юл хәрә­кәтен көйләде, автотранспортны туктатып тикшерде, кагыйдәләрне бозучыларга протоколлар төзеде.

Бүген дә бердәм коллективка тупланган ЮХХДИның данлыклы ветераннары — үз һөнәрләре буенча иң яхшылар, тәҗрибәле һәм ышанычлы ярдәмчеләр. Һәм аларның һәрберсе — Дәүләт авто­инспек­циясенең искиткеч тарихының бер өлеше.