Алда — бишьеллык план

Башкортстаннан съезд эшендә Дәүләт җыелышы-Корылтай Рәисе, “Бердәм Русия” партиясенең төбәк бүлекчәсе секретаре Константин Толкачев җитәкчелегендә иң зур делегацияләрнең берсе катнашты. Тәүге көнне съезд эшендә катнашу­чылар “Дәүләт сыйфаты”, “Үсеш һәм иминлек икътисады”, “Социаль сәясәт”, “Акыллы көч һәм мәдәни лидерлык”, “Сәламәт киләчәк”, “Үз йортыңда хуҗа бул”, “Аграр юнә­лештә ныклы үсешкән дәүләт” темалары буенча төрле мәйданчык­ларга бүленеп фикер алышты. 22 гыйнварда исә съездның пленар утырышы үтте. Анда бишьеллык эшчәнлеккә йомгак ясалды, шулай ук Югары һәм Генераль советларга әгъзалар сайланды. “Бердәм Русия” партиясе рәисе итеп делегатлар чираттагы тапкыр Дмитрий Медведевны, Югары Совет Рәисе вазыйфасына Борис Грызловны сайлады. Партиянең Югары Советы составына, шулай ук, Башкортстан Башлыгы Рөстәм Хәмитов керде. Константин Толкачев һәм Павел Качкаев — Генераль Совет составына, Рафаэль Мәрданшин Үзәк контроль комиссиясе составына сайландылар.

Әйтергә кирәк, съезд партия тормышында да, гомумдәүләт үсешендә дә байтак мөһим башлангычлар һәм карарлар белән билгеләнде. Мәсәлән, аерым дәүләтләр тарафыннан Русиягә карата кабул ителгән санкцияләргә генә бәйле түгел, гомумән, илнең аграр тармагын үстерү, азык-төлек белән үзебезне үзебез тәэмин итү дәүләт сәясәтендәге өстенлекле бурыч булуын сызык өстенә алып, Дмитрий Медведев тармакны финанслау күләме агымдагы елда да былтыргыдан ким булмаячагын билгеләде.

“Бердәм Русия” партиясе илдә эшкуарлык үсешенә киңрәк юл ачу һәм административ киртә­ләрне мөмкин кадәр киметү максатында да мөһим башлангыч белән чыкты.

—Без алга таба да бизнес юлын­дагы административ киртә­ләрне гамәлдән чыгаруны дәвам итәчәкбез. Бу җәһәттән эшкуарларга һәр ведомство тарафыннан ел саен тикшерү үткәрүне өч елга бер тапкыр комплекслы тик­шерү үткәрү белән алыштырырга тәкъдим итәм. Шулай ук контроль-күзәтү органнары эш­чән­легенә карашны да үзгәртергә кирәк, — диде бу уңайдан Дмитрий Медведев.

Янә килеп, ил Хөкүмәте Премьер-министры, “Бердәм Русия” партиясе лидеры фикеренчә, коммер­циягә карамаган социаль юнә­лешле оешмаларга җәмгыять өчен файдалы эш башкаручы статусы алуда да ярдәм кулы сузарга кирәк. Дмитрий Анатольевич бел­де­рүенчә, бу аларның эшчәнлек нәтиҗәлелеген яңача күләм һәм сыйфат дәрәҗәсенә күтәрү мөм­кинлеге бирәчәк.

Аерым игътибарны исә Дмитрий Медведев кабул ителүче карарлар, аларның үтәлеше һәм нә­тиҗә­ле­леге өчен партиянең җаваплылыгы мәсьәләсенә юнәлт­те.

— Русиянең Дәүләт думасына сайлауларда “Бердәм Русия”, электоратның күпчелек тавышын җыеп, илдә лидерлык позициясен янә саклап калган икән, бу, тәү чиратта, халыкның аңа зур ышанычы хакында сөйли. Шуңа да ил хал­кының якланганлыгы, иминлеге өчен партия иңнәрендә гаять зур җаваплылык ята. Без, законнар чыгару дәрәҗәсендә мөһим карарлар кабул итеп кенә калмыйча, аларның үтәлешен дә җитди контрольгә алырга тиешбез. Бу җәһәттән “Бер­дәм Русия”, илдәге әйдәүче партия буларак, алга таба да Пре­зиден­т­ның уң кулы, таянычы булып калырга тиеш, — диде, бурычлар билге­ләп Дмитрий Медведев.

Моңа бәйле ул “Бердәм Русия” партиясеннән депутатларның министрлар белән даими консуль­тацияләр үткәрү механизмын кертү зарурлыгын да сызык өстенә алды. Дмитрий Медведев билгеләвенчә, бу ике як өчен дә, ахыр чиктә, дәүләт үсешенә һәм халык­ның тормыш сыйфатын яхшыртуга юнәл­телгән гомум нәтиҗәдә уңай чагылыш табачак.

Гомумән, “Бердәм Русия” пар-тия­сенең ХVI съездында илкүләм әһәмияткә ия шундый эшлекле карарлар байтак булды. Шунысы мөһим: аларның ярыйсы гына өлеше Башкортстан җирлегендә яралып, республикадан Дәүләт думасына сайланган депутатлар тарафыннан тәкъдим ителде. Әйтик, модераторы Башкортстаннан депутат Павел Качкаев булган “Үз йортыңда хуҗа бул” дискуссион мәйданчыгында “Бердәм Русия” партиясе әгъзалары капиталь ремонт буенча программаларны тормышка ашыру өлкә­сен-дә контрольне бермә-бер катыландыру башлангычы белән чыкты.

— Бүген ил халкы капиталь ремонт фондына байтак акча күчерә. Димәк, шушы өлкәгә җитди халык контроле булдыру да максатка ярашлы булачак, — диде бу уңайдан Павел Качкаев.

Башкортстаннан депутат Рафаэль Мәрданшин исә ил Хөкү­мәте Премьер-министры һәм “Бердәм Русия” партиясе лидеры Дмитрий Медведевның бизнесны ел саен тикшерүне өч елга бер комплекслы тикшерү белән алыштыру башлангычына зур канәгать­лек белдерде. Депутат бизнесны контроль орган­нарының нигезсез тик­шерү­лә­реннән, башбаштаклыгыннан арындыру юнәлешендә инде узган чакырылышлардан ук колачлы эш­чән­лек алып бара. Һәм менә ул китергән дәлилләр закон проекты нигезенә ятачак.

Съезд делегаты, “Ана һәм бала” хәйрия фонды һәм өстәмә белем бирү үзәге директоры Тимур Кунак­куҗин исә Дмитрий Мед­ведевның икенче бер башлангычына бәйле, Башкортстанда инде бүген үк коммерциягә карамаган оешма­ларның дәүләт власте органнары белән тыгыз хезмәттәшлек тәҗ­рибәсе булуын сызык өстенә алды.

Съездда республикада авыл клубларын модернизацияләү буенча тупланган уңай тәҗрибә дә башка төбәкләргә үрнәк итеп куелды. Моңа, тәү чиратта, партия төбәк бүлекчәсенең “Урындагы мәдәният йорты” проектын тормышка ашыру нәтиҗәсендә ире­шелә. Башкортстанның күп­функ­цияле авыл мәдәният йортларын ачуда илдә лидер булуын сызык өстенә алып, Русиянең мәдәният министры Владимир Мединский, бу тәҗрибәне ил күләмендә тарату да максатка ярашлы булыр иде, дип бил­геләде.

Съезд тәмам, ә анда кабул ител­гән мөһим карарларны тормышка ашыру буенча эш әлегә башланып кына тора. Бу җәһәт­тән алдагы биш ел партия өчен дә, илнең һәм аның күпмил­ләтле халкының социаль-икътисади үсешендә дә бик күп мөһим казанышлар, яңача тормыш дәрә­җәсе белән билгеләнер, дип ышанасы килә. Ә монысы инде илдә әйдәү­че фирка булган “Бер­дәм Русия” партиясе карар­ларының ни дәрә­җәдә үтәлешенә, аның эшчәнлек нәти­җәлелегенә дә турыдан-туры бәйләнгән.