Яшәгән урыныбыз төзек һәм матур булсын!

– Былтыр әлеге проектны гамәлгә ашыруга Русиянең барлык төбәкләре дә кушылмады. Башкортстанда да программада 23 муниципалитет кына катнашты. Шулай булуга карамастан, Русия­нең Төзелеш министрлыгы проектны гамәлгә ашыру нәтиҗәләре буенча төзегән рейтингта республика сигезенче урынны алды, – диде республика Хөкүмәте Премьер-министры урынбасары Николай Хорошилов журналистлар белән очрашу вакытында.
Быел проектны гамәлгә ашыруда барлык 63 муниципалитет та катнашачак. Ихаталарны һәм җәмәгать урыннарын төзеклән­дерүгә 1 миллиард 66 миллион сум юнәлтеләчәк, шуның 891 миллионы – федераль, 175 миллионы республика бюджетларыннан бүленә. Былтыр бу сумма азрак иде.
Агымдагы елда төзекләндере-ләсе ихаталар саны элекке күләм­дә калса, җәмәгать территория-ләренеке былтыргы 37дән 119га кадәр арткан.
Узган елда проектны гамәлгә ашыру җитешсезлекләрне дә ачыклады. Беренчесе һәм иң җитдие эш башлау вакытына кагыла: берничә район гына объектларны төзекләндерүгә июнь-июль айларында тотынды, калганнары эшне август-сентябрьдә башлады. Соңга калуның үз сәбәпләре дә бар иде: бөтен җирдә дә конкурс чараларын беренче тапкырдан үткәреп булмады, проектлар озак әзерләнде, экспертизалар үткәрү сузылды. Былтыргы хаталар исәпкә алынган: быел ихаталарны төзеклән­дерү июньдә үк, ә җәмәгать территорияләрен 1 июльдән башлау планлаштырыла.
Республикада графиктан алда баручы төбәкләр дә бар: 44 ихатада һәм территориядә эшләр башланган да инде. Сүз Нефтекама, Межгорье шәһәрләре, Дүр­төйле, Белорет, Зианчура һәм Архангель районнары турында бара. Тагын ике нәрсәгә игътибар итәргә кирәк: бу фикер алышулар­ның “подъезд алды митинглары” формасында үтүе һәм гамәлгә ашырырга тәкъдим ителгән проект­ларның тиешле дәрәҗәдә булмавы.
Уфада тавышка куелган ун территориянең икесе җиңгән. Шуларның берсе – Кашкадан паркы.
Республиканың торак-коммуналь хуҗалык министры Сергей Афонин белдерүенчә, паркны төзекләндерү өчен быел бюджетта 122 миллион сум каралган. Монда волейбол мәйданчыгы һәм тамашачылар өчен трибуна куелачак, тренажерлар һәм велоюллар бе­лән спорт мәйданчыклары җиһаз­ландырылачак, тротуар плитәсе алыштырылачак, агачлар һәм куаклар утыртылачак, шулай ук күл буе төзекләндереләчәк. Реконструкция тулысынча киләсе елда тәмамланырга тиеш.
Алдагы елларга смета төзе­гәндә дә халык фикерен исәпкә алырга вәгъдә итәләр: тавыш бирүдә быел “җиңелгән” объектлар киләсе елда төзекләндерелү хокукына ия.
Гомумән алганда, республика шәһәр һәм районнарын төзеклән­де­рүгә һәртөрле программалар ярдәм итә. Дәүләт җыелышы-Корылтайның Бюджет, салым, инвестиция сәясәте һәм территория­ләр үсеше буенча комитеты рәисе Рузалия Хисмәтуллина белде­рүенчә, Башкортстанда урындагы халык актив роль уйнаган төзек­ләндерү проектлары 2014 елдан гамәлгә ашырыла. 2015 ел­да республикада башка субъект­ларда булмаган “Эшлекле гамәл­ләр“ партия проекты старт алды. Ул республика һәм урындагы бюджетлардан финанслауны, шулай ук халык акчасын җәлеп итүне күз уңында тота. Өч ел эчендә халыкның көнүзәк проблемаларын хәл итүгә 850 миллион сум акча юнәлтелгән: шуның 650 миллионы республика бюджетыннан, 150се урындагы бюджетлардан, калган акчаны урындагы халык җыйган. Бу вакыт эчендә 2800 объект төзекләнде­релгән. Сайлаучылар наказын үтәү өчен булдырылган проект федераль дәрәҗәгә җитте: былтыр аны гамәлгә ашыруга Дәүләт думасы депутатлары һәм Федерация Советы әгъзалары кушылды.
Урындагы башлангычларга нигезләнгән программа да республика бюджетыннан финанс­лана. Былтыр ул Уфада гына эш­ләп килгән иде, быел аңа янә 12 шәһәр кушылган.
– Сигез ел элек республика җи­тәк­чесе Рөстәм Хәмитов башлангычы белән Башкортстанда Русиядә беренчеләрдән булып ихаталар төзекләндерелә башлады. Шулай ук торак пунктларда урамнарны яктыртуны яңарту программасы кабул ителде. Авыл биләмәләренә финанс ярдәме күрсәтелә, – дип ассызыклады Сергей Афонин йомгаклау сүзендә.

Резеда ГАЛИКӘЕВА.