Бәйрәм итәр өчен... эш кирәк!

Дөресен әйтергә кирәк, Башкортстанның төп дәүләт бәйрәме — Республика көнендә шушы рәвешле тантаналылык, киң колач­лылык, мәйданнарда чын мәгънәсендә бәйрәм кәефе хөкем сөрүе, милли җыр-моңнар агылуы, ярминкәләр гөрләве соңгы елларда сагындырган иде.

Узган гасырның 90нчы елларыннан килгән күркәм традицияне дәвам итеп, иң тәүдә милли батыр Салават Юлаев һәм быел гына урнаштырылган Шәехзадә Бабич һәйкәлләренә чәчәкләр салынды. Аннары республиканың яңа җитәк­челеге, Башкортстанның төп бәй-рәме көнендә үзенең кайдадыр читтә түгел, газиз ватандашлары белән бергә булырга тиешлеген искә төшереп һәм ассызыклап, халык белән тулы мәйданнарга чыкты. Аерым алганда, Салават Юлаев исемендәге мәйданда Башкортстан Башлыгы Радий Хәбиров “Русия Федерациясе Хәрби көчлә­рендә контракт буенча хәрби хез­мәт — Синең сайлау” патриотик акциясендә катнашучылар белән аралашты. Шушы ук көнне (өч-биш көн алдан түгел) “Башкортостан” Дәүләт концерт залында үткән тантаналы җыелышта республика халкын олуг бәйрәм белән котлаганнан соң, “Торатау” Конгресс-холлында төбәкара, илкүләм һәм халыкара олимпиадаларда җиңгән мәктәп укучылары белән очрашты. Аннары шәһәр һәм район хакимияте башлыклары белән башкаланың иң яхшы парк зоналарында булып, шушы алдынгы тәҗрибәне бөтен республика күләмендә тарату бурычын куйды. Кичке якта исә Радий Хәбиров “Торатау” Конгресс-холлында үткән Тапкырлар һәм шаяннар клубы Уфа лигасының ярымфинал уеннарын тамаша кылды.

Республика җитәкчелегенә ки­лүенә әле бер генә ел тулуга карамастан, Радий Хәбировның башын горур тотып, мәйданнардагы халык алдына чыгарлыгы да, Республика көнен әүвәлгечә киң колач белән үткәрерлеге дә, четерекле сораулар биргәндә дә күзләрен яшерми, чынбарлыкның йөзенә карап сүз алып барырлыгы да бар икән шул. Һәм моның сәбәбе дә гади генә: Радий Фәрит улының республика мәнфәгатендә күзгә бәреп торган биниһая анык эшләре бар!

Дөрес, Республика көне уңаен­нан тантаналы җыелыштагы чыгышында Радий Хәбиров соңгы ел­да ирешелгән казанышларга бик аз гына тукталып үтте, күпчелек сүзне исә, Башкортстан үсешенә зур өлеш керткән фидакарь хезмәт кешеләренә һәм данлыклы җитәк­челәргә багышлады, алар булдырган нигезне какшатмаячагына, кулдан килгәнчә ныгытачагына һәм үстерәчәгенә ышандырды.

Хәер, моның шулай булачагын инде бүген үк, Радий Хәбировның югары вазыйфада беренче ел эшчәнлек нәтиҗәләреннән чыгып та, ышанычлы әйтергә мөмкин.

— Бүген без төзелеш өлкә­сендә янә яхшы темпларга чыктык. Инвес­тицияләр җәлеп итүдә зур үсешкә ирештек, биш алгарышлы социаль-икътисади үсеш зонасы төзе­дек. “Алга” аерым икътисади зонасын формалаштыру буенча эш бара. Быел без 800 йортны һәм 4 мең подъездны ремонтлаячакбыз. Янә дә 400 ихата территориясе, парк һәм сквер, балалар һәм спорт мәйданчыклары тәртипкә ките­ре­ләчәк. Мең километрдан күб-рәк урам яктыртылды. Уфада заманча Спорт әзерлеге үзәге ачылды. Мең километрдан күб­рәк автомобиль юлларын төзек­ләндердек. Үтәкү­рен­мәле һәм нәтиҗәле коммуни­ка­цияләр булдыра алдык, аның ярдәме белән дистә меңләгән кешеләр үзләрен борчыган мәсьә­ләләрне хәл итте.

Без мәктәп мәгарифенең форматын үзгәртүне башладык. Барлык уку йортларын да биш көнлеккә күчердек, “Мәгарифтә — күтә­релеш!” проектына старт бирдек. Яңа балалар бакчалары һәм мәктәпләр, шул исәптән ике полилингваль гимназия ачтык. Медицина кадрларына булган дефицитны бетерүдә, халыкны сәламәт­ләндерүдә, үлем күрсәт­кечен киметүдә сизелерлек уңыш­ларга ирештек. 50 яңа дә­ваханә, табиблык амбулаториясе һәм фельдшер-акушерлык пунктлары ачтык. Ел эчендә без-гә 2,5 миллион турист ял итәргә һәм сәламәтлеген ныгытырга килде. Ә безнең “Янгантау” геопаркы исә Русиядә һәм БДБ илләрендә беренче булып ЮНЕСКО­ның глобаль геопарклары челтәренә кертелде.

Алда безне зур һәм мөһим эш­ләр көтә. Алар “сентябрь” Указында чагылыш тапты. Әлеге колачлы эшнең төп максаты — Башкортстан халкының лаеклы һәм бәхетле яшәешен тәэмин итү, — диде бу уңайдан чыгышында Радий Хәбиров.

Хәер, республика Башлыгы чыгышында соңгы бер елда турыдан-туры аның башлангычы һәм җитди контроле астында ирешелгән уңыш-казанышларның уннан бер өлеше чагылыш тапты микән?! Шул ук “Башавтотранс” һәм “Башкортостан” нәшрияты кебек стратегик дәү­ләт унитар предприятиеләренең банкротлыктан саклап калынуы, аларның беренчесенә 500 чамасы яңа автобус сатып алынуы, пассажирлар ташу базарының легаль булмаган автобус йөртүчеләрдән тазартылуы, алданган өлешләр проблемасының, ниһаять, чишелеш табуы, барлык дәүләт струк­тураларының халыкка йөз белән борылуы, Башкортстанның табигать һәйкәле — Торатауның саклап калынуы һәм башкалар, һәм башкалар — югыйсә, болар хакында да авыз тутырып сөйләргә булыр иде. Ә нигә сөйләп торырга? Бак­саң, халык, һәрберебез бу уңайлык­ларны, бу мөһим үзгәрешләрне үз тормышында, үз яшәешендә болай да яхшы тоя бит! Ә менә Радий Хәбировның республика данын күтәргән элекке данлыклы җитәкче­ләргә, фидакарь хезмәт батырларына ихлас рәхмәт белдерүенә аларның гына түгел, алар рухы белән яшәгән гомум Башкортстан халкының да чын-чыннан күңеле булгандыр, мөгаен.

Республика көне уңаеннан бул­ган өч көнлек бәйрәмнәрдә янә бер элекке күркәм традициянең тергезелүенә күңел ихлас шатланды. Бәйрәмнең икенче көненә үк, Башкортстан Башлыгы Радий Хәбиров эш сәфәре белән Стәр­лебаш һәм Федоровка районнарына чыгып китте. Ягъни моның белән ул бәйрәм гомум халык өчен өч көн булган очракта да, җитәк­челәр өчен алай озайлы була алмавын хәтергә төшерде. Ә беренче җитәкче ничек — мотлак, башкалар да аның үрнәгенә иярә. Моннан чыгып әйтәсе килгән фикер: димәк, урындагы җитәкчеләр “йокымсырап” утырган чор да республика тарихында артта калды, дияргә кирәк. Ә бу инде яңача нәтиҗәләр, яңа югарылык, яңа дәрәҗәдәге эш дигән сүз. Ә эш, нәтиҗә булган җир­дә, күренүенчә, бәйрәмнәр дә күпкә күркәмрәк!