+21 °С
Болытлы
Көнүзәк
25 март 2020, 16:55
Алдагы атна ял атнасы итеп игълан ителде
Владимир Путин халыкка мөрәҗәгать белән чыгыш ясады.
– Русия үзенең географик урнашуына бәйле рәвештә коронавирустан читтә кала алмый. Илебезнең күршеләрендә инде җитди зарарланган дәүләтләр бар. Вирусның Русиягә үтеп керү мөмкинлегенә тулысынча киртә куеп булмый. Без эшли алган һәм эшләгән гамәл – ул профессиональ дәрәҗәдә эшләү. Төп өстенлек – гражданнарның хәвефсезлеге һәм сәламәтлеге, – дип башлады мөрәҗәгатен Русия Президенты Владимир Путин.
Ил җитәкчесе табиблар, фельдшерлар, шәфкать туташларының; шулай ук хастаханәләр, поликлиникалар, ФАПлар, ашыгыч ярдәм хезмәтләре хезмәткәрләре, галимнәрнең “ил сакчылары” ролен башкаруы турында белдерде. Владимир Путин гражданнарны табиблар һәм хакимият органнары таләпләренә аңлап карарга чакырды.
Шул исәптән Владимир Путин Конституциягә төзәтмәләр кертү буенча тавыш бирү датасының күчерелүе турында игълан итте.
Шулай ук алдагы атна (28 февраль – 5 апрель) хезмәт хакын саклап калу шартларында ял атнасы дип игълан ителде. Ял атнасында тормышны тәэмин итү структуралары – медицина учреждениеләре, даруханәләр, кибетләр, банклар, транспорт һәм барлык хакимият органнары эшләячәк. Озын яллар авыруның таралу тизлеген киметү өчен кирәк, дип белдерде Президент.
Владимир Путин социаль-икътисади вәзгыять турында да сүз алып барды.
1. Алдагы 6 ай дәвамында гражданнарга тиешле барлык социаль пособиеләр һәм ташламалар автомат рәвештә озайтылачак. Өстәмә белешмәләр җыю өчен төрле инстанцияләргә йөрү кирәкмәячәк.
1. Алдагы 6 ай дәвамында гражданнарга тиешле барлык социаль пособиеләр һәм ташламалар автомат рәвештә озайтылачак. Өстәмә белешмәләр җыю өчен төрле инстанцияләргә йөрү кирәкмәячәк.
2. Президент гаиләләргә ярдәм күрсәтү мөмкинлеген ассызыклады. Шул максатта алдагы 3 айда, апрельдән башлап, ана капиталы ала торган барлык гаиләләргә өстәмә рәвештә 3 яше тулмаган балаларның һәрберсенә 5әр мең сум түләргә тәкъдим итте. Июльдә гамәлгә кертелә торган 3-7 яшьтәге балаларга түләнә торган пособиеларны июнь аенда ук түли башларга тәкъдим ителде.
3. “Больничный”ларда булганнарга яисә эшсез калучыларга ярдәм күрсәтергә кирәк булуы турында да әйтелде. “Больничный”ның МРОТка тигез яисә күбрәк булырга тиешлеге тәкъдим ителде. Мондый нормалар бу елның азагына кадәр гамәлдә булачак.
4. Владимир Путин куллану һәм ипотека кредитларын “кредит каникуллары”на җибәрергә тәкъдим итте. Каникулларны хезмәт хакы 30 проценка кимегән һәрбер кеше ала алачак.
5. Кече һәм урта эшкуарлыкка да дәүләт тарафыннан ярдәм күрсәтү каралган. НДСтан башка барлык салымнар да 6 айга гамәлдән чыгарылачак.
Владимир Путин дәүләт һәм җәмгыятьнең бергә килешеп эшләгән очрагында гына килеп чыккан авырлыкларга каршы торырга мөмкин булуын белдерде. Һәм үзебезнең һәм якыннарыбызның хәвефсезлеген һәм сәламәтлеген кайгыртырга киңәш бирде.
Фото: "Известия" телеканалыннан кадр
