"Кызыл таң"чыларга коронавирус киртә була алмый!

Язгы өмәләргә "Кызыл таң"чылар да кушылды.

Республикада төбәк Башлыгы Радий Хәбиров тарафыннан игълан ителгән “Эстетика елы” кысаларында язгы өмәләр дәвам итә. Эпидемиологик хәлнең катлаулы булуына карамастан, шәһәр-районнарда оешма, предприятие, хуҗалык, мәгариф учреждениеләре хезмәткәрләре, барлык санитар нормаларны үтәп, тирә-юньне тәртипкә китерә, чүп-чардан тазарта.

Бу өмәләргә “Кызыл таң” нәшрияты коллективы да беренчеләрдән булып кушылды. Журналистлар, кулларына тырма һәм себерке алып, Матбугат йорты алдындагы территорияне тәртипкә китерде.

— Без ел саен үзебезгә беркетелгән территориядә өмә ясыйбыз. Күмәк эшкә кул түзми, дигән борынгылар. Әлбәттә, быелгы хәл-шартлар аркасында аны элеккечә күмәк һәм күңелле итеп башкару мөмкин түгел. Шулай да саклык чараларын күреп, битлек-перчаткаларда, бер-беребездән таләп ителгән дистанцияне саклап, тирә-якны тазартуга, ямьләндерүгә үз өлешебезне керттек, — ди баш мөхәррир урынбасары Рәфис Сәяхов.

Дөнья буйлап таралучы коронавирус пандемиясе тормышның күп кенә өлкәләренә тыюлар кертсә дә, ул чисталыкка киртә була алмый!

Фото: Юлия Төхбәтуллина