+21 °С
Болытлы
Көнүзәк
16 октябрь 2020, 10:05
“Гадәттән тыш эш режимына күчәбез”
Башкортстан Башлыгы Радий Хәбиров коронавирус таралуга каршы чараларны катгыйлату бурычын куйды.
Башкортстан Башлыгы Радий Хәбиров коронавирус таралуга каршы чараларны катгыйлату бурычын куйды.
Республика Башлыгы Радий Хәбиров 13 октябрьдә үткән оператив киңәшмәдә Хөкүмәт составындагы үзгәрешләр хакында җиткерде. Атап әйткәндә, хәзер Хөкү-мәт Премьер-министры урынбасарлары тугызга кала – вице-премьер Фәнүр Ягафәров Башкортстан Башлыгы Хакимиятенә эшкә кайтачак. Башкортстанда өч дәүләт комитеты министрлыкларга үзгәртелде. Аерым алганда, Төзелеш һәм архитектура, Транспорт һәм юл хуҗалыгы, Сәүдә һәм хезмәт күрсәтү министрлыклары барлыкка килде. Моннан тыш, Үсеш корпорациясе һәм Стратегик эшләнмәләр үзәге җитәкчеләре Хөкүмәт составына кертелде.
Башкортстанда мәктәп укучыларының каникулларын озайту турында карар кабул ителде. Төбәк җитәкчесе билгеләп үткәнчә, мәктәп укучылары өчен яллар инде 17 октябрьдә үк башланырга һәм 4 ноябрьгә кадәр дәвам итәргә тиеш. Мәгариф һәм фән министры сүзләренә караганда, 13 октябрьгә төбәктә 983 укучы ОРВИ белән авырган, мәктәп яшендәге тагын 200гә якын балада һәм 150дән артык педагогта covid-19 расланган.
Башкортстанда коронавирус таралуга бәйле оператив мәгълүматны сәламәтлек саклау министры Максим Забелин җиткерде. “Үлем дәрәҗәсе элеккечә 0,5 процент кала, авырулар саны 100 мең кешегә 230 тәшкил итә. Күрше төбәкләрдән аермалы буларак, хәл тотрыклы, әмма үсеш бар һәм дәвам итә”, — дип билгеләде сәламәтлек саклау министры.
— “60-65+” категориясенә карата чараларны көчәйтүне, аларга үзизоляцияләүне тәкъдим итәбез”, — диде Максим Забелин.
1 декабрьгә кадәр республикада зур чаралар үткәрелмәячәк. Бу хакта Радий Хәбиров белдерде. “Барлык чараларны да диярлек 1 декабрьгә кадәр туктатырга, яки аз кеше катнашлыгында үткәрергә кирәк”, — диде ул. Мәдәният министры вазыйфаларын башкаручы Наталья Лапшина, театр-концерт залларында урыннар яртылаш тула, тамашачылар шахмат тәртибендә утыра, залга битлекләрдә генә керә, дип белдерде. Китапханәләргә һәм музейларга бер үк вакытта 50дән артык кеше кертелми, театр һәм концерт оешмалары каршында күчмә чаралар һәм гастрольләр өлешчә туктатылган. Авыручыларга көн саен мониторинг алып барыла.
Мәдәният министрлыгы залларның тулылыгын 30 процентка кадәр киме-тергә, барлык төр түгәрәк эшләрен, урам чараларын ике тапкыр кыскартырга һәм онлайн эш режимын максималь рәвештә файдаланырга, иң мөһим һәм кирәкле чараларны гына үткәрергә тәкъдим итте.
Радий Хәбиров эш бирүчеләргә үз хезмәткәрләрен читтән торып эшләү форматына күчерү зарурлыгын белдерде.
“Мин барлык оешма һәм предприятие җитәкчеләренә кешеләрне мөмкин булганча дистанцион эшкә күчерергә киңәш итәр идем. Әйдәгез, нинди дә булса тәкъдим итү нормасын да кабул итик”, — диде ул.
Узган ялларда, 11 октябрьдә, Уфада Республика көне уңаеннан киңкүләм күңел ачу чаралары узды. Сәхнә йолдызлары үзләренең бушлай концертларында меңләгән кешене җыйды. Республика Башлыгы оператив киңәшмәдә шундый катлаулы вакытта ни өчен моңа баруын аңлатты.
— Дөресен генә әйткәндә, без Республика көненә әзерләнгән вакытта хезмәттәшләрем арасында миңа бу чараны үткәрмәскә тәкъдим итүчеләр дә булды. Әмма минем өчен бу хәрби парадны үткәрмәү кебек. Безнең беркайчан да җыелмыйча, ветераннарыбызны хөрмәтләмичә калганыбыз юк, — диде Радий Хәбиров. — Монда да шулай.
Ул: “Мәдәният министрлыгына бәйрәмдә битлек режимын оештыру йөкләнде, әмма битлекне беркем дә кимәде”, — дип билгеләп үтте.
Киңәшмә ахырында Радий Хәбиров Хөкүмәт әгъзаларын куркыныч авыруга каршы җитди көрәшкә чакырды. Республика җитәкчесе, дуслары һәм туганнары инфекция белән авырды, дип белдерде.
— Коллегалар, мин бу вакыт эчендә бик күп нәрсә күрдем. Бик якын иптәшләрем, туганнарым авырды. Бик, бик авыр чир. Ярый әле бу кешеләр исән калды. Әмма без бит авыруның нинди нәтиҗәләргә китерәчәген белмибез, — диде Башкортстан Башлыгы. — Мин сезгә гади халыкка кебек мөрә-җәгать итмим: сезнең иңнәрдә зур йөкләмәләр дә, республикада яшәүче миллионнарча кеше өчен җаваплылык та ята. Хөкүмәт эше гадәттән тыш хәл-шартларында яшәвебезне истә тотып оештырылырга тиеш. Бездә формаль яктан югары әзерлек режимы бар, тик асылда бу — гадәттән тыш хәл режимы. Хөкүмәт эшен шуңа юнәлтегез дә.
Беренче акцент: бу нәкъ менә коронавирус инфекциясенә каршы көрәш. Әгәр кешеләр авырса, үлсә, безнең барлык инвестицияләр, ихаталар нигә кирәк? Шуңа күрә, коллегалар, бу режимга аңлау белән күчәбез. Мин моңа тыныч карыйм, ләкин бу көрәш юлы кыска да, җиңел дә булмас кебек. Миңа әйтүе кыен, фаразламыйбыз да, ләкин озын юлга әзерләнегез!
Резеда ГАЛИКӘЕВА.
