+21 °С
Болытлы
Көнүзәк
19 Май 2021, 07:07
Һәр бала туган телен белергә тиеш
Башкортстан һәм Татарстан вәкилләре туган телләрне өйрәнү мәсьәләләрен тикшерде.
Кичә Татарстанның Актаныш районында Башкортстан Дәүләт җыелышы-Корылтайның һәм Татарстан Дәүләт Советының Мәгариф, мәдәният һәм фән буенча профильле комитетларының уртак утырышы узды. Анда мәдәниятләр диалогы үсешендә туган телнең роле турында фикер алыштылар. Утырышта ике төбәк парламентлары спикерлары, депутатлар, җәмәгать эшлеклеләре катнашты.
Парламентарийлар Русия мәгариф оешмаларында туган телләрне өйрәнү мәсьәләләре буенча фикер алышты. Исегезгә төшерәбез, Башкортстан Дәүләт җыелышы-Корылтай "этномәдәни белем бирү оешмасы" төшенчәсен кертү һәм аның эшчәнлеген регламентлауда милли мәктәпләр статусы турындагы закон проектын әзерләде. Русия Дәүләт думасы документны эшләп бетерүгә кире кайтарды һәм башкорт депутатларының "түгәрәк өстәл" уздыру турындагы башлангычын хуплады.
Дәүләт җыелышы-Корылтайның вице-спикеры, Президиум рәисе Эльвира Аеткулова туган телне өйрәнү мәсьәләсе буенча бөтен илнең ата-аналар җәмәгатьчелегенең, төбәкләр парламентарийларының позициясе таләп ителә, дип саный.
«Бер генә төбәк түгел, ә барлык милли республикалар һәм төбәкләр вәкилләренең Русиядә туган телләр өйрәнү зарурлыгы буенча үз фикерләрен белдерүләре кирәк», - дип билгеләп үтте Эльвира Аеткулова.
Исегезгә төшерәбез, хәзер балаларны беренче сыйныфка кабул итү бара, шулай ук укучыларны киләсе белем дәрәҗәсенә күчерү дә. Русия Федерациясе халыклары телләре арасыннан туган телне сайлау балалар бакчасына, мәктәпкә кабул иткәндә һәм икенче дәрәҗәгә яки бер белем бирү оешмасына күчергәндә укучыларның ата-аналары (законлы вәкилләре) гаризасы буенча гамәлгә ашырыла.
Балалар бакчасына кабул иткәндә, гаризаны “Балалар бакчасына электрон чират” мәгълүмат сервисы аша, шулай ук мәктәпкәчә белем бирү оешмасына кергәндә, шәхсән үзе тапшырырга мөмкин; мәктәпкә кабул иткәндә һәм (яисә) башка мәктәпкә күчергәндә, гариза шәхсән бирелә; почта аша тапшыру турында хәбәрнамә белән; мәктәпнең электрон почтасы аша; мәктәпнең рәсми сайты аша; дәүләт яисә муниципаль хезмәтләр сервислары ярдәмендә; белем бирүнең киләсе дәрәҗәсенә, ата-аналар җыелышларына күчергәндә.
