Радий Хәбиров яңа юлүткәргеч буенча хәрәкәткә старт бирде

Исегезгә төшерәбез, Уфадан көньяк чыгу районында транспорт чишелешен реконструкцияләүне 2021 елның гыйнварында башладылар. Проект юлүткәргечне дүрттән алты полосага кадәр киңәйтүне күздә тоткан. Моннан тыш, киләчәктә Салават Юлаев проспектында хәвефсез борылыш оештыру өчен күперне озынайттылар.

Башта төзүчеләр 2021 ел ахырына яңа юл үткәргечен монтажларга планлаштырганнар иде, ләкин эшләрне оптимальләштерү һәм өстәмә көчләрне җәлеп итү нәтиҗәсендә проектны алдан билгеләнгән планнардан иртәрәк төгәлләргә мөмкин булды. Объектта тәүлек буе Уфаның 30нчы күпер төзү отряды һәм Пермьнең 123нче күпер төзү отряды белгечләре эшләде.

Радий Хәбиров, корылманы карап чыгып, юлүткәргеч аша хәрәкәткә старт бирде. Башкортстан Башлыгы шулай ук шәһәр хакимияте җитәкчелеге, республика Хөкүмәте һәм подряд оешмалары вәкилләре белән Уфадан көньяктан чыгу районында транспорт инфраструктурасын модернизацияләү буенча киләчәк планнар турында фикер алышты.

Төшү юлларын оештыру эшләре 2022 елның август ахырына кадәр алып барылачак. Моннан тыш, юлүткәргечне Агыйдел елгасы аша яңа автомобиль күперенә чыгу белән бәйләргә кирәк, ул 2021 елның көзендә төзелеп бетәчәк.

- Төзүчеләребезгә югары эш темплары һәм халкыбызга сабырлык күрсәткәннәре өчен рәхмәт әйтәсем килә, - диде Радий Хәбиров. - Бу объектта әле күп нәрсә эшлисе бар. Ләкин иң мөһиме - ул зур транспорт агымына исәпләнгән, димәк, монда тыгыннар азрак һәм хәрәкәт уңайлырак булачак.

Фото: glavarb.ru