-16 °С
Болытлы
Гәзиткә язылуVKOKTelegramЯRus
Барлык яңалыклар
Көнүзәк
31 август 2021, 11:10

Моңлы чыңла, тәүге кыңгырау!

Ул быел хезмәттәшебез Азамат Абдрәфыйковның өченче, төпчек улы Райман өчен дә яңгыраячак. 1 сентябрьдә илебезнең барлык мәктәп укучылары өчен яңа уку елының беренче кыңгыравы яңгыраячак. Әлбәттә, иң дулкынланганы — быел беренче тапкыр белем йортының ишеген ачучы кызлар һәм малайлардыр.

Динар Калимуллин
Фото:Динар Калимуллин

Уфа районының Шамонино бистәсендә бу уку елында 180 бала беренче сыйныфка бара. Шуларның берсе — Райман Абдрәфыйков. 7 апрельдә 7 яшь тулган малайга. Ул инде укый-яза белә, инглиз телен дә өйрәнә. Кечкенә булса да, заман сулышын яхшы тоя егет, “Тик-ток” челтәрендә канал алып бара. “Ютуб” белән дә мавыга. Музыкага да мөкиббән Райман.

— Мәктәптә миңа күңелсез булмас микән, мин бит инде укый да, яза да беләм, — дип бераз борчылып та тора әле Райман.Белем дөньясында тагын әллә күпме ачышлар көтә бит әле үзен, югыйсә!

Укырга-язарга әти-әнисе өйрәт­кән дисезме? Һич юк! Әти-әнисе аны хәрефләр белән генә та­ныш­тырган, ә укырга ул үзе Интернет ярдәмендә өйрәнгән. “Окей, гугл, как научиться читать?” — дип сораган да... Менә шулай. Югыйсә, компьютерда уеннар уйнаганда язылган биремнәрне укый белергә кирәк бит. Тоткан да үзаллы өйрәнгән Райман укырга. Шундый үзаллы егет ул. Һәм беркөн әти-әнисен укый белүе белән шаккатырган.

Гаиләдә төпчек малай Райман. Зур абыйсы Арслан — җидегә, уртанчы абыйсы Әскар бишенче сыйныфка бара быел. Арслан техника белән мавыга, ә Әскар рәсем төшерергә, озын шигырьләр ятларга ярата. Әтисе Азамат — “Кызыл таң” гәзите редакциясендә компьютер бүлеге мөдире, әнисе Розалия эшкуарлык белән шөгыльләнә. Өченче улларын быел мәктәпкә илтүче Абдрә­фыйковлар бераз дулкынлана да. Ни дисәң дә, чор гади түгел, пандемия әле үтмәгән. Шулай да киләчәкнең бары яхшы булачагына ышана алар. Иртәгә — Белем көне. Әти-әниләр, укучылар, мөгаллимнәр өчен зур бәйрәм. Балачакның иң гүзәл мизгелләренең берсе тантана итәчәк. Шатлык тулы, имин, хәвеф-хәтәрсез булсын яңа уку елы!

Ләйсән Якупова

Читайте нас в