Туган телне өйрәнү гаиләдә башлана

Бүген "Торатау" Конгресс-холлында республика Ата-аналар форумы һәм Башкорт тарихы елын йомгаклауга багышланган чара үтә. Чара "Туган телнең көче" фильмын карау һәм ырулар парады белән ачылды.

Русия Федерациясе Дәүләт думасы депутаты, Бөтендөнья башкортлары корылтае Президиумы рәисе Эльвира Аеткулова форумда катнашучыларны сәламләде һәм чараны башкорт халкының гимны "Урал-батыр" көе белән ачылуын үтенде. "Бүген - безнең бай, истәлекле көн. Бүген узып баручы Башкорт тарихы елына йомгак та ясыйбыз. Бүген әлеге эшчәнлекне алып баруда зур нәтиҗәләргә ирешкән районнарны да билгеләрбез", - диде ул.

- Без Бөтендөнья башкортлары корылтае белән бердәм эшлибез, төрле чаралар үткәрәбез. Заман шартларына ярашып, төрле электрон форматта да эш алып барыла. Бүген башкорт телендә 120 фильм бар, әле тагын берничә фильм төшерү белән шөгыльләнәбез. Министрлык башкорт милли киемнәренә багышланган чаралар, шәҗәрәләр бәйрәмнәре оештыра. Чит төбәкләрдә яшәүче башкортлар өчен төрле чаралар, мастер-класслар үткәрәбез. Тарихи хәтерне саклау, яшьләргә патриотик тәрбия бирүгә дә зур игътибар бирәбез. Бу җәһәттән быел республиканың төрле төбәкләрендә дистәдән күбрәк тактаташ куелды. Башкорт телен, мәдәниятен үстерүгә сәхнә йолдызлар да күп көч сала. Алар әлеге елга багышланган 500дән күбрәк концерт куйды. Гомумән, безнең министрлык бу елда лаеклы эшләре белән аерылып торды, - диде республиканың мәдәният министры Әминә Шәфыйкова һәм эшчәнлекләре белән зур уңышларга ирешүчеләргә дәүләт бүләкләрен тапшырды.

Чарада республиканың Мәгариф министрлыгының эшчәнлеге дә югары бәяләнде.

- Үсеп килүче буын туган башкорт телен өйрәнергә тиеш. "Туган телләрне саклау һәм үстерү" башлангычы бу җәһәттән аеруча зур әһәмияткә ия. Бу уку елында башкорт телен дәүләт теле булырак өйрәнү 67,8 процентка җитте. Узган елда бу күрсәткеч 65 процент иде. Без туган телне өйрәнү методикасының сыйфатына да зур игътибар бирәбез. Телне өйрәнү башка фәннәрне өйрәнү кебек үк дәрәҗәдә булырга тиеш. Мәктәпләрдә билгеле шәхесләр исемен йөрткән класслар булдыру, тарихыбызга бәйле булган чаралар үткәрү, халыкара диктант язу, Башкорт теле көнен үткәрү, кобаерлар сөйләү конкурслары оештыру - барысы да безнең игътибар үзәгендә булды. Әмма шуны да онытырга ярамый, тәү чиратта, бала туган телендә әти-әнисе белән аралаша. Шуңа да җәмәгатьчелек белән эшләүне дә дәвам итәчәкбез, - диде республиканың мәгариф министры урынбасары Әлфия Галиева.

Эльвира Аеткулова Башкорт тарихы елын үткәрүдә аеруча зур ярдәм күрсәтүчеләргә төрле бүләкләр тапшырды. Форум көн дәвамында төрле мәйданчыкларда төрле темаларга бүленгән очрашулар белән дәвам итәчәк.