Уфаның 450 еллыгына әзерлек ничек бара?

Республика Башлыгының иҗтимагый киңлекләрне һәм шәһәр мохитен үстерү мәсьәләләре буенча киңәшчесе Ольга Сарапулова инде 2022 елда ук нинди шәһәр территорияләрен үзгәртә башлаячаклары турында сөйләде.

- Уфада шәһәр халкын һәм Башкортстан башкаласы кунакларын җәлеп итү үзәкләре булачак берничә мәйданчык әзерләдек, алар шәһәрнең йөзен бизәп, яңа визит карточкасы булачак, - диде Ольга Сарапулова. - Сүз Уфаның тарихи үзәге турында гына бармый. Планда - ерактагы территорияләрне төзекләндерү: Дим районында «Үзәк» парк, Орджоникидзе районындагы Нефтехимиклар паркы, Инорстагы Тёплое күле һәм башкалар.

- Эш масштабы бик зур. Иң мөһиме – шәһәрдә яшәүчеләрнең төзекләндерү проектлары буенча фикер алышуда катнашуы, - диде Радий Хәбиров. - Бу парклар һәм скверларны без, барыннан да элек, уфалылар өчен булдырабыз, шуңа күрә халык аларның йорты янында ниләр булачагын белергә тиеш.

- Моннан тыш, 2024 елга кадәр без Уфаның тарихи үзәгендә урам инфраструктурасын реконструкцияләүне планлаштырабыз, - дип хәбәр итте Ольга Сарапулова. - Урамнар автомобильчеләр, җәяүлеләр һәм велосипедчылар өчен уңайлырак булачак.

Киңәшмәдә катнашучылар, шулай ук, төзекләндереләчәк парклар һәм скверлар янында урнашкан күпфатирлы йортларның фасадларын, шулай ук күперләрнең, биналарның һәм урамнарның архитектура-сәнгать яктырткычларын ремонтлау мәсьәләләре буенча фикер алышты.

Фото: glavarb.ru