Тамчылар тамар чаклар, ташулар агар чаклар

Елгаларда су дәрәҗәсенең максималь күтәрелүе Агыйдел (+56 сантиметр), Бәләкәч (+53), Инҗәр (+48), Юрмаш (+48 сантиметр) елгаларында күзәтелә.
Исегезгә төшерәбез, республика халкына елгаларда агымдагы гидрологик хәлләрне Баш­кортстанның Гадәттән тыш хәлләр буенча дәү­ләт комитеты сайтында “Ташкын” геомәгълүмат системасы аша онлайн-режимда күзәтү мөмкинлеге бирелә.

Теләсә нинди гадәттән тыш хәл килеп чыккан очракта “112” те­лефонына шалтыратырга кирәк.
“Кадерле дуслар, сез узган кышның ни дәрәҗәдә карлы булуын беләсез. Шуңа бәйле рә­вештә елгалар дәрәҗәсенең сизелерлек күтәрелүен көтәбез. Язгы ташуга әзерләнергә кирәк, – ди бу хакта республика Хөкү­мәте Премьер-министры Андрей Назаров. – Ташу – безнең өчен табигый характердагы га­дәттән тыш хәлләрне ничек башкарып чыгуыбызга еллык имтихан. 2021 елда стихия вакыты узган елдагыга караганда җитдирәк булды. Оператив төркемнәр су басу урыннарында патрульлек итте, зыян күрүчеләр өчен вакытлыча урнаштыру пунктлары оештырылды”.
Премьер-министр сүзләренчә, узган ел ахырында табигый һәм техноген характердагы гадәттән тыш хәлләр шартларында хәвеф­сезлек чараларын көчәйтү өчен федераль законга үзгәрешләр кертелгән. Хәзер гражданнар мондый хәвеф булган террито­рия-ләрдән эвакуацияләнергә тиеш. Әлбәттә, вакытлыча урнаштыру пунктларына, анда гаиләләргә бөтен кирәкле әйберләр дә би­реләчәк.

“Элек эвакуация ирекле иде. Ни өчен хәзер ул мәҗбүри? Эш шунда ки, коткаручылар еш кына кешеләрнең, гомере һәм сәламәт­легенә куркыныч янауга карамас­тан, өйләреннән китәргә телә-мәүләре белән очраша. Милекнең саклыгына борчылуларын аң­лыйм, әмма кешеләр еш кына хә­веф дәрәҗәсен бәяләп бетерми. Ә мондый ваемсызлык бәясе артык зур булуы ихтимал. Әлбәттә, мәҗ­бүри эвакуацияне реаль куркыныч янаган очракта гына үткә­рәчәкләр”, — дип аңлатты Анд­рей Назаров.
Күп нәрсә үзебездән дә тора. Хәтәр хәлгә юлыкмас өчен түбәндәге кагыйдәләрне истән чыгармыйк:
* Гадәттән тыш хәл һәм мондый шартларда эш итү тәртибе турындагы мәгълүматны игътибар белән тыңлагыз.
* Кыйммәтле әйберләрне өй түбәсенә яки башка хәвефсез җиргә күчерегез.
* Йорт җиһазлары, көнкүреш техникасын мөмкин кадәр югарыга күтәреп куегыз.
* Ишек, тәрәзәләрне ябыгыз.
* Электр һәм газны сүндере­гез.
* Йорт хайваннарын хәвеф­сез урынга күчерегез.
* Баздан азык-төлекне чыгарыгыз.
* Ихатада су агызып алып китәрдәй әйберләр калдырмагыз яки бәйләп куегыз.
* Итекләр, көймә, салларны алдан әзерләп куегыз.
* Кыйммәтле әйберләр, документлар, беренче кирәк-яракны кул астында тотыгыз.
* Өч көнлек азык, җылы әй­берләр, гигиена чараларын әзер­ләгез.
* Аптечка, шәм, шырпы, фонарь һәм аңа запас батарейкалар алыгыз.
* Өй түбәсенә менү өчен баскычыгыз булсын.

Резида ВӘЛИТОВА.