Идел буе федераль округы "стрит-арт"чылары фестивалендә җиңүчеләр билгеләнде

"ФормART" стрит-арт фестиваленең финал этабында традицион рәвештә Русиянең теләсә кайсы кешесе катнаша алган иҗтимагый тавыш бирү үткәрелде, финалистлар өчен шулай ук төбәк һәм федераль дәрәҗәдәге белгечләр аерым тавыш бирде. Тавыш бирүдә барлыгы 111 меңнән артык кеше һәм 90 эксперт катнашты.

Бәяләү суммасы буенча җиңүче булып Башкортстаннан Артур Мөҗипов эше танылды. Аның сүзләренә караганда, рәсемдәге Һомай безнең каршыбызда милли костюм кигән башкорт кызы образында күрсәтелә. Бу очраклы түгел, чөнки милли костюмның япма һәм декорында табигый мохит һәм хуҗалык-көнкүреш торышы гына түгел, ә халыкның этник үзенчәлекләре дә, аның рухи мәдәнияте һәм ышанулары да чагылыш таба.

Икенче урынны Самара өлкәсеннән Семён Ефентьев яулады. Өченче урын Чувашстаннан Алексей Черневка "Иҗат" дигән граффити өчен тапшырылды.

Әлеге фестиваль берничә этапта узды: сайлап алу, презентация һәм финал. Быел фестивальнең гомум приз фонды 650 мең сум тәшкил итте. Җиңүчеләрнең һәм призерларның һәркайсы иҗатны үстерүгә шәхси грант алды: 1 урын – 200 мең сум, 2 урын – 150 мең сум, 3 урын – 100 мең сум, "Иҗтимагый танылу" махсус номинациясе - 100 мең сум.