Республика Башлыгы Роман Головченко белән очрашты

Очрашу башында Беларусь Премьер-министры Башкортстанның беренче Президенты Мортаза Рәхимовның төбәкне үстерүгә һәм халыкара хезмәттәшлекне ныгытуга зур өлеш кертүен билгеләп үтте.

- Радий Фәрит улы, республиканың беренче Президенты Мортаза Гобәйдуллович Рәхимов вафатына бәйле рәвештә Башкортстан халкының кайгысын уртаклашам, - диде Роман Головченко. - Аның башлангычлары Башкортстанның заманча идарә итү командасы эшендә дәвам итә. Ышанам, республика алга таба да прогрессив үсештәге төбәкне ничек төзергә кирәклеген үрнәк күрсәтәчәк. Башкортстанга узган елгы сәфәр вакытында мин сезнең планнарыгыз һәм ниятләрегез күп булуын күрдем. Аларны уңышлы тормышка ашыруны телим.

Премьер-министр шулай ук Беларусь һәм Башкортстан бизнесының үзара хезмәттәшлеге нәтиҗәлелеген югары бәяләде.

- Без элек ирешелгән килешүләрне тормышка ашыруны игътибар белән күзәтәбез. Безнең хезмәттәшлекнең үсеше белән алар үзгәрешләр кичерә, заманча чынбарлыкны исәпкә алып актуальләшә. Шунысы мөһим, шул ук вакытта алар безнең яклар өчен үзара файдалы булып кала, - дип өстәде Роман Головченко. - Шулай итеп, "Башкорт сода компаниясе" кальцийланган соданы Беларуська турыдан-туры китерү буенча оптималь карар булдырылган. Бу башкорт җитештерүчеләре һәм Белоруссия кулланучылары өчен отышлы килешү. Башкортстанда берничә җитештерү мәйданчыгы төзүче «АМКОДОР» компаниясе белән сәнәгать кооперациясе дә уңышлы үсеш ала.

Радий Хәбиров, кабул итүе һәм уртак эш нәтиҗәләре турында фикер алышу мөмкинлеге өчен, Белоруссия ягына рәхмәт белдерде.

- Без мөһим тенденцияне күрәбез. Предприятиеләрнең күбесе Белоруссия компанияләре белән кооперациягә җәлеп ителә. Безнең делегация составында Белоруссия коллегалары белән эшләргә теләгән бизнесның яңа юнәлешләре вәкилләре бар, - дип билгеләде төбәк җитәкчесе. - Без шулай ук үзебез өчен яңа мөмкинлекләр ачабыз. Юл, коммуналь һәм авыл хуҗалыгы техникасына ихтыяҗ зур. МАЗ туристик автобуслары зур кызыксыну уята. Башкортстанда яңа производстволарны локальләштерү һәм җиңел сәнәгатьтә безнең компетенцияләрне берләштерү буенча тәкъдимнәр бар.