Батырларның исеме үлемсез

25-27 август көннәрендә Санкт-Петербургта тәкъдим ителгән «Башкортстан Ватанны саклауда» күргәзмәсе шәһәр халкын һәм кунакларын Русиянең Башкортстан Геройлары, сугышчыларыбызның илнең Җиңүгә керткән өлеше һәм Бөек Ватан сугышы фронтларында һәлак булган солдатларның исемнәрен кире кайтара торган республика эзтабарлары хәрәкәте белән таныштыра.

Экспозиция Академия дәүләт капелласының ишегалдында урнашкан. Монда панорама стендларында 1812 елгы Ватан сугышында, Гражданнар сугышы елларында Петроградны саклауда башкорт отрядларының катнашуы турында мәгълүмат бирелә.

Аерым тема - Башкортстанның 112нче кавалерия дивизиясе формалашу тарихы һәм аны җитәкләгән генерал Миңнегали Шәйморатов турында персоналия.
Билгеле булганча, легендар Башкавдивизия командирына күптән көтелгән исем 2020 елның 30 мартында Русия Президенты Владимир Путин указы белән немец-фашист илбасарлары белән көрәштә күрсәткән батырлыгы өчен бирелде.

Стенд Украинада махсус хәрби операция темасы белән тәмамлана, анда катнашу өчен Башкортстанда Шәйморатов, Доставалов һәм Салават Юлаев исемендәге ирекле батальоннар оештырылды. Монда ук Русия Геройлары исемен алган башкортстанлылар да бар. Алар— Максим Серафимов (үлгәннән соң), Степан Белов, Тамерлан Илһамов (үлгәннән соң), Игорь Насыйбуллин (үлгәннән соң), Борис Дудко, Алмаз Сафин (үлгәннән соң).

«Башкортстан Ватанны саклауда» күргәзмәсендә Бөек Ватан сугышы елларында фашизмны Җиңүгә керткән өлешкә зур игътибар бирелә. Аклы-каралы фотоларның репродукцияләре республика халкының Җиңү хакына кичергән авырлыклары турында сөйли. Монда фронтка ярдәм дә, тылда авыр хезмәт тә, предприятиеләрне Башкортстанга эвакуацияләү дә, эвакогоспитальләрдә яраланганнарны дәвалау күренешләре дә бар.

Фото: Альбина Зубарева.