Уфа вакыты белән 21.00 сәгатьтә Башкортстанда тавыш бирү тәмамланды, барлык сайлау участоклары ябылды, тавышлар санала башланды. Сайлауның беренчел нәтиҗәләре дүшәмбе иртәсенә яңгыраячак.
Тавыш бирү бүген иртәнге җидедән башланды. Башкортстан халкы 110 депутат сайлый, ә кайбер шәһәрләрдә һәм районнарда шәһәр, поселок һәм авыл советлары депутатларын сайлый. 110 мандатка бездә 859 кандидат заявка биргән, ягъни уртача «конкурс» бер мандатка сигез кандидат туры килә. Муниципаль сайлаулар буенча җиде меңнән артык мандатка 14 меңнән артык кандидат заявка биргән. Төбәктәге участокларда тәртипне 13 меңнән артык кеше тәэмин итте, аларны сайлауларны күзәтү буенча иҗтимагый штаб әзерләде. Партия вәкилләре сүзләренчә, сайлаулар тыныч узды.
- 20.00 сәгатьтә 1 миллион 430 мең 87 сайлаучы тавыш бирде, бу исемлеккә кертелгәннәрнең 47,8 процентын тәшкил итә, - диде Башкортстан Республикасы Үзәк сайлау комиссиясе секретаре Марина Долматова. - 49 районда сайлаучыларның активлыгы 50 проценттан артык тәшкил итте, шуларның 12сендә — 70 проценттан артык. Хәзерге вакытта барлык сайлау участокларында сайлау процессында катнашучылар өчен күптән көтелгән Бердәм тавыш бирү көне этабы башлана — тавышларны санау, ул гомумән сайлау нәтиҗәләренең нигезе булып тора. Тавышларны санау да берничә этаптан тора, һәр этап тәмамлангач, протоколларның тиешле юллары һәм аларның зурайтылган формалары тутырыла.
#БашкортостанВыборы2023