+21 °С
Болытлы
Көнүзәк
17 ноябрь 2023, 11:50
Радий Хәбиров: "Сезнең белән горурланабыз!"
Бүген Уфаның Совет мәйданында Башкортстан Башлыгы Радий Хәбиров Русия Эчке эшләр министрлыгы системасында участок полиция хезмәткәрләре хезмәте оешуга 100 ел тулуга багышланган тантаналы чарада катнашты.
Радий Хәбиров: "Сезнең белән горурланабыз!"
Тантана алдыннан Радий Хәбиров һәм хөрмәтле кунаклар 112нче Башкавдивизиянең легендар командиры, Русия Герое, генерал-майор Миңнегали Шәйморатов һәйкәленә чәчәкләр салдылар.
Төбәк җитәкчесе полиция хезмәткәрләрен һөнәри бәйрәмнәре белән котлады, «Иң яхшы участок полиция хезмәткәре», «Балигъ булмаганнар эшләре буенча иң яхшы инспектор» һәм «Административ күзәтчелекне гамәлгә ашыру буенча иң яхшы инспектор» номинацияләрендә һөнәри осталык конкурсларында җиңүчеләргә дәүләт бүләкләре, шулай ук дипломнар һәм акчалата сертификатлар тапшырды.
- Сезне участок хезмәткәрләре хезмәте оешуга 100 ел тулу белән чын күңелдән котлыйм!
Республикада яшәүче һәр кеше өчен нәкъ менә сез – иң төп яклаучылар, һәр тормыш ситуациясендә ярдәмчеләр. Күп нәрсә сезгә бәйле. Участковый лаеклы хезмәт иткән җирдә һәрвакыт тәртип һәм тынычлык булганда кешеләр үзләрен куркынычсыз хис итә. Сез ел саен йөзләгән җинаятьләрне, меңләгән административ хокук бозуларны ачыклыйсыз, суррогат спиртлы эчемлекләр сатуны туктатасыз, социаль яктан начар гаиләләр белән эшлисез, көнкүреш җинаятьләрен профилактикалау белән шөгыльләнәсез.
Республиканың участок уполномоченныйлары хезмәтенең шәхси составы һәрвакыт батырлык, югары профессионализм, сизгерлек һәм кешеләргә игътибар белән аерылып торды.
Сез еш кына үз тормышыгызны куркыныч астына куясыз, теләсә нинди көтелмәгән хәлдә ярдәмгә килергә әзер. Мәсәлән, Салават шәһәреннән участок хезмәткәре Руслан Сәйфуллин, Сибай участок хезмәткәре Азамат Куланбаев икеләнеп тормыйча утка ташландылар һәм кешеләрне янгыннан коткардылар. Хезмәт бурычына батырлык һәм тугрылык өчен сезгә һәм хезмәттәшләрегезгә рәхмәт!
Участок уполномоченныйлары хезмәте ветераннарына аерым рәхмәт белдерәсем килә. Сез хезмәтнең иң яхшы традицияләрен сакларга булышасыз һәм яшь хезмәткәрләргә кыйммәтле тәҗрибә бирәсез.
Хөрмәтле иптәшләр! Бу истәлекле көнне сезгә һәм якыннарыгызга сәламәтлек һәм иминлек, авыр һәм җаваплы хезмәттә уңышлар телим!
Без сезне бик кадерлибез һәм сезнең белән горурланабыз! - диде Радий Хәбиров үз чыгышында.
Фото: glavarb.ru
