Дуслыкның кадерен яхшы беләбез

Чара 26-27 ноябрьдә республика башкаласында уза торган Русия һәм Казахстанның ХХ төбәкара хезмәттәшлек форумы кысаларында узды. Форум делегатларына сәламләү сүзендә Башкортстан җитәкчесе ике төрки халыкның уртак тарихи тамырлары булуын билгеләп үтте.

- Башкортстан белән Казахстанны күп гасырлык традицияләр, мәдәният, тел бәйли. Бу безнең илләр лидерлары – Владимир Путин һәм Касым-Жомарт Кемелевич Токаев актив рәвештә хуплаган туганнарча хезмәттәшлегебезнең нигезе. Аларның бер – берсенә ихтирамлы мөнәсәбәте партнерлыкны үстерү өчен ышанычлы нигез булдыра, - дип ассызыклады Радий Хәбиров. - Бүген без Башкортстан һәм Казахстан бизнесын берләштерүче яңа уртак проектлар формалаштыру этабында. Ышанам, яшьләр, безнең халыклар арасында дуслык һәм эшлекле элемтәләрне ныгытып, бу процессның этәргеч көче булыр.

Русия икътисади үсеш министры урынбасары Дмитрий Вольвач Казахстан һәм Русия арасындагы хезмәттәшлекне үстерү өчен чараның мөһимлеген билгеләп үтте.

- Яшь эшкуарлар бизнесны алга җибәрүдә төп роль уйныйлар, яңа тармакларны һәм алымнарны үзләштерәләр. Уфадагы Форум уникаль мәйданчык булды, анда Русия һәм Казахстаннан 130дан артык катнашучы тәҗрибә уртаклаша, партнерлык элемтәләрен җайга сала ала, – диде Дмитрий Вольвач. - Безнең илләрнең уртак проектлары халыкара базарларга чыгуга беренче адым була. Казахстан белән партнерлыктан башлап, Русиядән яшь эшкуарлар үз идеяләрен сынап карау һәм бизнесны алга таба глобаль базарларга чыгуга әзерләү өчен уникаль мөмкинлек ала.

Казахстанның сәүдә һәм интеграция вице-министры Кайрат Торебаев билгеләп үткәнчә, Уфаны халыкара форумны уздыру мәйданчыгы итеп сайлау казах һәм башкорт халыклары арасындагы хезмәттәшлекнең күпьеллык традицияләре һәм төбәкнең үсеш дәрәҗәсе белән аңлатыла.

– Бүгенге чара заманча инфраструктуралы шәһәрдә уза. Моның символы спорт һәм мәдәни мәйданчык булып хезмәт итүче көрәш сарае булды, - диде Кайрат Торебаев. - Русия һәм Казахстан төбәкара хезмәттәшлек форумы-инициативаны Яшь буынга тапшыру өчен мөһим адым, ул киләчәктә безнең хезмәттәшлекнең нигезе булачак.

Башкортстанда эшкуарлыкка ярдәм кысаларында төрле яшьләр программалары гамәлгә ашырыла. "Яшлек. Бизнес " үз эшен булдыруда һәм үстерүдә ярдәм итә. 2023 елда очрашуларның яңа форматы – «Бизнес-открытка» эшли башлады, анда эшкуарлар бер-берсе белән уңышлы тәҗрибә уртаклаша. Төбәктә шулай ук «Росмолодежь.Бизнес» җәмгыятендә фәнни һәм технологик стартапларны үстерүгә аерым игътибар бирелә. Эшкуарларга ярдәм итүдә бизнес-шерифлар – муниципалитет башлыклары урынбасарлары мөһим роль уйный, алар урыннарда инвестицияләр мәсьәләләре белән җитәкчелек итә. Башкортстанның кече һәм урта бизнес өлкәсендә барлыгы 560 меңнән артык кеше эшли.

Фото:glavarb.ru