Ир-егетләрнең күбесе ишле гаилә турында хыяллана

Республика йортында Башкортстан Хөкүмәте Премьер-министры урынбасары, спорт министры Руслан Хәбибов җитәкчелегендә дәүләт Гаилә сәясәте буенча координацион совет утырышы узды. Совет әгъзалары туучылар саны күрсәткечләренә анализ ясады, республиканың хәзерге гаилә портретын һәм гаилә институтын үстерүгә төрле хезмәтләрнең җәлеп ителешен карады.

- Мәгариф учреждениеләрендә гаилә кыйммәтләрен популярлаштыру, студент гаиләләренә ярдәм итү чаралары, гаилә ялын оештыру, шул исәптән күпбалалы гаиләләргә ташламалар бирү – бу мәсьәләләр даими игътибар таләп итә. Туучылар саны күбрәк гаиләгә финанс ярдәме дәрәҗәсенә дә, аларның ялын оештыруга да бәйле, - дип билгеләде Руслан Хәбибов.

Башкортстанның гаилә, хезмәт һәм халыкны социаль яклау министры Ленара Иванова билгеләвенчә, "Гаилә" яңа гомумдәүләт проекты 5 федераль проектны үз эченә ала һәм барлык этапларда гаиләләргә ярдәм итүне колачлый. Аерым федераль проект күпбалалылыкны үстерү буенча дәүләт гаилә сәясәте өстенлекләрен билгели. "Гаилә елы"нда федераль дәрәҗәдә күпбалалы гаиләнең бердәм хокукый статусы һәм бу категория өчен төп социаль гарантияләр билгеләнде.

Спикер, шулай ук, ВЦИОМ мәгълүматларына нигезләнгән кызыклы статистика китерде: ачыклануынча, безнең күбебез күпбалалы гаилә турында хыяллана, һәр икенчесе өч һәм аннан да күбрәк балалы гаилә теләр иде. Сораштыруда җавап бирүчеләрнең 53 проценты нәкъ менә шул хакта белдергән. Өстәвенә, күпбалалык яклылар, нигездә, ирләр: алар бу хакта хатын-кызларга караганда 1,8 тапкыр ешрак белдергән, дүрт һәм аннан да күбрәк балалы гаилә телиләр. Әмма, министр сүзләренчә, чынбарлыктагы һәм хыялдагы балалар саны арасындагы аерма зур булып кала.

Моңа комачаулаучы төп чикләүләр - матди шартлар, ресурслар һәм вакыт җитмәү, ата-аналарның, бигрәк тә хатын-кызларның, бала туганнан соң социаль һәм һөнәри адаптациясе.

– Гаилә сәясәте, асылда, хәл ителә торган мәсьәләләр буенча комплекслы, тармакара характерда һәм чиктәш өлкәләрдәге мәсьәләләрнең киң колачына кагыла, - дип йомгаклады Ленара Иванова һәм оешма җитәкчеләрен, Координацион совет әгъзаларын республиканың гаилә һәм демографик сәясәте көн тәртибендә актив катнашырга өндәде.

Фото: bashinform.ru