Урап-урап, карлар күмә...

Башкортстан Ватанны саклаучылар истәлеген мәңгеләштерү буенча округ проектында беренче урын өчен Русия Президентының Идел буе федераль округындагы Тулы вәкаләтле вәкиле Игорь Комаровның дипломы белән бүләкләнде. Хөкүмәт киңәшмәсендә республика Башлыгы Радий Хәбировка дипломны Башкортстан буенча Баш федераль инспектор Александр Окатьев тапшырды.

Чарада Радий Хәбиров Тәтешледә күппрофильле колледж ачу кирәклегенә басым ясады. Мондый мөмкинлекне карауны ул беренче вице-премьер Урал Килсенбаевка һәм республиканың мәгариф министры Илдар Мәүлетбирдинга йөкләде. “Тәтешледә колледж кирәк. Районда яхшы колледж булмаганлыктан, егетләр чит төбәкләргә китә”, – диде ул. Урал Килсенбаев белдерүенчә, бу уңайдан якын арада эшләнәчәк кайбер фикерләр бар инде.

Киңәшмәдә Урал Килсенбаев республиканың полилингваль мәктәпләре челтәре эше турында чыгыш ясады. Бүген полилингваль мәктәпләрнең төбәк челтәренә 11 алдынгы белем бирү учреждениесе керә, алар географик яктан республиканың төрле шәһәрләрендә һәм районнарында урнашкан.
Моннан тыш, Уфада һәм Стәрлебаш районында полилингваль балалар бакчалары эшли. “2030 елга кадәр республикада тагын 5 полилингваль мәктәп ачарга планлаштырабыз”, — дип хәбәр итте Урал Килсенбаев.

Махсус операция геройларына багышланган “Батырлык тавышы” подкастлары сериясе кешеләрдә, бигрәк тә үсеп килүче буында, зур уңыш казанды. Бу хакта Республика СВО ветераннары ассоциациясе рәисе Оскар Ситдыйков белдерде. Аның сүзләренчә, 12 чыгарылышның 10сын карау саны миллионнан артып киткән. “Мөһим мәгърифәтчелек һәм тәрбия эше белән контент формалаша, бигрәк тә яшьләр арасында. Уңыш сайланган форматның дөреслеген һәм мондый башлангычларга югары иҗтимагый ихтыяҗны раслый”, – диде Оскар Ситдыйков.

Хәрби офицер “Ватанга хезмәт итәм” республика мәгариф форумы кысаларында СВО ветераннары ассоциациясе утырышының ничек узуын сөйләде.
“Мин инде берничә тапкыр муниципалитет башлыкларына махсус хәрби операциядә катнашучылар белән зур эштә төп партнер барлыкка килүе турында әйттем: бу – СВО ветераннары ассоциациясе”, — дип ассызыклады Радий Хәбиров.

Республика Русиянең фәнни-технологик үсешенең илкүләм рейтингы нәтиҗәләре буенча 7нче урынны алды. Бу хакта Фән һәм югары белем бирү буенча дәүләт комитеты рәисе Светлана Мостафина хәбәр итте. Ул билгеләп үтүенчә, Башкортстан, 2024 елдагы белән чагыштырганда, бер позициягә күтәрелде. “Республиканың ким дигәндә лидерлар өчлегендә булуын көтәбез — моның өчен бездә барысы да бар”, — дип шәрехләде төбәк Башлыгы.

Республика җитәкчесе трассаларда хәрәкәт чикләүләре белән бәйле хәлне контрольдә тотарга кушты. “Кыш җитте. Без инде берничә тапкыр транспорт хәрәкәтен чикләдек. Мин муниципалитет башлыкларына да юл тыгыннарына эләккән кешеләргә ярдәм итү зарурлыгына басым ясыйм. Гадәттән тыш хәлләр буенча дәүләт комитеты моны эшләргә тиеш. Берничә ел элек төбәкләрнең берсендә хәтта кешеләр һәлак булды. Кисәтергә, вакытлыча җылыту пунктларын җәелдерергә, ярдәм күрсәтергә кирәк. Безнең моңа бөтен мөмкинлекләребез бар. Игътибар белән эшләгез”, — диде Радий Хәбиров.

Транспорт һәм юл хуҗалыгы министры Любовь Минакова хәбәр итүенчә, көн саен республика автомобиль юлларына 900 берәмлектән артык техника җәлеп ителә, шул исәптән федераль әһәмияттәге юлларга — 210 берәмлек.