Ягулыкка бәйле хәл: Башкортстанда җиде район махсус контрольдә

Башкортстанда ягулык белән тәэмин итү мәсьәләсе махсус контрольдә кала. 14 августка «кызыл зона»да җиде район исәпләнә. Республика Сәнәгать, энергетика һәм инновацияләр министры урынбасары Эдуард Мостафин сүзләренә караганда, бу исемлеккә АЗСларның 50 проценттан артыгы эшләмәгән муниципалитетлар керә.

Кармаскалы районында шәхси АЗСлар эшләми, «Башнефть» станцияләрендә дә аерым кыенлыклар бар. Шул ук вакытта Уфа–Инҗер–Белорет юнәлешендәге АЗСларда ягулыкның барлык төрләре дә бар. Районга көн саен ике ягулык ташучы машина килә.

Ишембай районында ягулык китерү авыррак. Монда аны ташудагы кыенлыкларга пилотсыз очкычлар куркынычы да өстәлә. Урал аръягында исә хәл тотрыклы дип бәяләнә.

Аерым районнарда чиратлар ягулык ташучы машиналарның соңарып килүе белән бәйле. Мәсәлән, Зирганда АЗС алдында чират кайвакыт бер километрга җитә. Белгечләр мөмкинлек булганда якындагы башка заправкалардан файдаланырга киңәш итә.

Дүртөйле районында бүген барлык 12 АЗС та эшли һәм алар ягулык белән тәэмин ителгән. Көйергәзе районында да барлык станцияләр эшли, ягулыкның барлык төрләре бар.

Авыл хуҗалыгы предприятиеләре дә эшен дәвам итә. Эдуард Мостафин билгеләп үткәнчә, һава торышы уңыш җыю өчен уңай, уңдырышлылык яхшы, урып-җыю эшләре актив бара.

Гадәттән тыш хезмәтләрнең автомобильләре АЗСларда аерым исемлек буенча исәпкә алынган һәм чиратсыз ягулык белән тәэмин ителә. Күтәртмә савытларга ягулык салуны тыю исә үз көчендә кала. Бу чикләү федераль дәрәҗәдә кертелгән.

"Кызыл таң"ның да МАХ мессенджерында рәсми каналы бар. Кушылыгыз!
Каналга кушылыр өчен шушы сылтама буенча үтегез: max.ru/kiziltan102