-6 °С
Болытлы
Гәзиткә язылуVKOKTelegramЯRus
Барлык яңалыклар
Календарьда бу көн
19 март 2016, 02:00

Ә син шигырь язасыңмы?

Бөтендөнья шигърият көнен уздырырга ЮНЕСКО ассамблеясенең 30нчы сессиясендә карар ителә. Аның нәкъ 21 март – көн һәм төн озынлыгы тигезләшкән чорда уздырылуы очраклы түгел. Бу көн табигать һәм кеше рухының үзгәрү көне буларак та билгеле. Беренче тапкыр ул 1999 елда Парижда – ЮНЕСКОның штаб-фатирында үткәрелә. Шигърият көнен искә алу поэтик сүзгә генә түгел, ә күптеллелеккә игътибар юнәлтү максатын да куя. Бу көнне югары уку йортларында, мәктәпләрдә әдәби кичәләр, очрашулар уза. Журнал, гәзит редакцияләре, китапханәләр төрле чаралар оештыра.

Шигъри сүз элек-электән илаһи мәгънәгә ия булган. Шагыйрьләрне сугыш каһар­маннарына, халык азатлыгы өчен көрә­шүчеләргә тиңләгәннәр. Шигъри сүз авыздан – авызга, колактан – колакка таралып, гыйлем, әхлак тараткан, гашыйкларга һәм газап чигүчеләргә юаныч булган. Пушкин, Лермонтовларның шигъри сүзләреннән хәтта патшалар да курыккан. Дөрес, базар заманы тантана иткән чорда шигърияткә игътибар кимеде. Ләкин моңа вакытлы күренеш дип ышанасы килә.

Башкортстан Язучылар берлегендә әгъза булып торучы 271 каләм иясенең өчтән икесе – шагыйрьләр. Язучылар берлеге каршындагы татар телле әдипләр берләш­мәсендәге 51 әгъзаның 39ын шулай ук шагыйрьләр тәшкил итә. Әгъза булмаган актив шигырь язучылар йөздән артык. Редак­цияләргә агылган хатларда да шигырьләр зур урын алып тора.
Читайте нас в