Табигатьнең начар чагы юк

1950 елның 23 мартында Бөтендөнья метеорологлары оешмасы барлыкка килүе хакында киң җәмәгатьчелеккә хәбәр ителә. Иртәгә үтәсе һөнәри бәйрәмне алар: “Һава торышы, климат һәм су мәгъ­­лү­мат эрасына” – девизы белән рухланып каршылый.

Бу чара төрле елларда төрле девиз астында үткән. Миңа, мәсәлән, аларның: “Һава торышы, климат һәм су – киләчәккә әйдәү­че көч”, “Табигать казаларын кисәтү – безнең һәм сезнең эш!”, “Ялгышу безгә хас түгел!”, “Үзегезгә ышаныгыз – безне онытмагыз!” дигәннәре ошады.

Метеорологлар халыкка ихтимал катаклизмнарны яки һава шартларының көйсезләнүен алдан хәбәр итәргә бурычлы. Алдан кисәтүләр халыкны йокысыннан уятып җибәрә. Әйткәндәй, җир-су, һава, шартларының атмосфера басымын үлчәү, гидрометеорология үзәкләренә хәбәр итү, кыскасы, бөтен күзгә күренгән һәм күренмәгән нәрсәләр өчен табигать-ана, ил һәм халык алдында сынау тоту – метеоролог һөнәренең асылын тәшкил итә!

Шуңа карамастан, бездә табигать һәлакәтләре килеп чыгып кына тора. Статистика мәгълүматларына караганда, соңгы ун ел­да 80 процент казалар метеорологик һәм гидрологик бәлаләр арка­сында килеп чыккан. Әйткәндәй, 50нче елларда табигать һәлакәтләре аркасында каза күрүчеләрнең югалтуларын компен­сация­ләү һәм җимереклекләрне төзәтү өчен ил казнасыннан – 4 миллиард, ә 90нчы елларда 40 миллиард доллар бүленгән.
Киләчәктә болар тагын да ямьсезрәк күренешкә, югалтуларга, зур фаҗигагә әверелмәсен өчен метеорологларга гына түгел , безгә дә күңелебездәге ваемсызлык бозларын кузгатасы бар әле, димәк.