+14 °С
Болытлы
Гәзиткә язылуVKOKTelegram
Барлык яңалыклар
Календарьда бу көн
29 март 2016, 02:00

Әйрәнгә ни җитә!

Баш авыртканнан нинди генә чара юк... “Цитрамон” төймәсеннән алып, тозлы кыяр суына кадәр. 1886 елда Атланта шәһәрендә яшәүче Джон Пембертон атлы берәүнең дә башы авырткан. Фармацевт һөнәрле бу полковникның кыяр суы булмаган, күрәсең, шуңа күрә ул кока чикләвеге агачы яфраклары, шикәр һәм кофеиннан карамель төсендәге сироп кайнатып эчкән.

Татлы һәм куе әлеге эчемлектән башы төзәлеп киткәч, Пембертон әфәнде аны даруханәдә сатуны җайга салырга булган. Беренче көннәрдә үк аны 5 центка сатып ала башлаганнар. Соңрак газлы суга салганнар, ә Пембертонның дусты Френк Робинсон аңа “Кока-Кола” дигән исем һәм махсус шрифт уйлап тапкан.

Пембертонның вафатыннан соң, Аза Кендлер аның хатыныннан “Кока-Кола”ның рецептын 2300 долларга сатып алган һәм эчемлекне тимер савытларда чыгара башлаган.

Ә 1893 елда Нью-Берн шәһәрендә яшәүче Калеб Брэдхем газлы су, шикәр, ванилин, кола чикләвеге һәм кайсыбер сирәк очрый торган майлар ярдәмендә ашказанын эшләтеп җибәрә, кәефне күтәрә торган эчемлек уйлап тапкан һәм аны “Пепси-Кола” дип атаган. Шул чордан башлап, менә инде йөз елдан артык бу ике эчемлек арасында “кайсыбыз яхшырак?” дигәнрәк бәйге бара. Безгә килгәндә, аларның икесе дә безнең эчем­лекләрдән калыша, нәкъ җырдагыча:

Их, кока-кола-кола...
Ике теләгем кала:
Берсе – әйрән, берсе – чәй,
Салып сөйләш, җиңгәчәй!

Читайте нас: