Сиксән яшьтә дә эштә!

Биктимер абыйның балачагы, барлык чордашларыныкы кебек үк, эштә үтә. Ә унҗиде яшендә аңа үз гоме­рендә тәүге тапкыр кинофильм карау бәхете тия. Шул көннән башлап Бикти­мер киномеханик булу хыялы белән яна башлый һәм теләгенә ирешә. Бәлә­бәйдә курсларда укып, Югары Усылы авыл мә­дәният йорты директоры булып эшли башлый, соңрак Стәр­летамак мә­дәни-мәгъри­фәтчелек училищесын тә­мамлый. Иң актив һәм белемле егет буларак, аны колхоз­ның комсомол оешмасы секретаре итеп сайлыйлар. Аннан ул район комсомол һәм партия оешмаларында инструктор булып эшли.

1962 елда Рәис Баһавет­динов Салават исемендәге колхоз рәисе булып сайлангач, партия комитеты секретарен сайлау мәсьәләсе килеп баса. Рәис Гобәйдулла улы, бу вазыйфага Биктимер Рә­фыйковны билге­ләүләрен сорап, район партия комитеты­на мөрә­җәгать итә. Һәм шуннан бирле аларның юллары бергә. Колхоз аякка басу белән алар авыл тормышын яхшырту өчен тырыша башлый: идарә һәм партия комитеты карары белән колхозчыларга йорт, каралты-кура салу өчен агач хәзерләү рөх­сәт ителә, процентсыз ссуда бирелә, сораган кешегә автотранспорт бүленә. Ике авыл һәм хутор өр-яңадан төзелә, дисәң дә була. Унынчы бишьеллыкта гына да хуҗалык бел­геч­­ләр өчен 13 фатир, аш­ха­нә, кунакханә төзетә, колхозчылар 15 йорт салып чы­га... Монда партком секре­та­реның роле никадәр зур бул­ганын ул елларны үз башыннан үткәрүче­ләр генә аңлар. Иң мөһиме – җитәкчеләр хез­мәт кешесенә йөз белән борыла, күр­сәт­кечләр өчен генә түгел, колхоз­чыларның эш һәм яшәү шартларын кайгырта, алар­ның белем һәм мәдә­ният дә­рә­җәсен арттыру өчен тырыша.

Авылдашлары Биктимер Рәфыйков­ны уңган, таләпчән кеше буларак белә. Артык шау-шу куптарып бармас, үз эшен белеп, җиренә җиткереп эшләр. Басуга килсә, күпме иген сугылуын гына түгел, ничек ашатулары, ял шартлары турында да сорашыр. Киң күңеллелек, кешеләргә игътибарлы һәм ихтирамлы булу – никадәр күркәм һәм дефицит сыйфатлар алар бүген!

Элек китапханә мөдире булып эшләгән М. Дәминова аның хакында: “Биктимер Корбангали улы китапханәгә эшкә йөргәндәй йөри иде”, – ди. Ник дигәндә, Биктимер абый читтән торып юридик институт та тәмам­ла­ган. Хуҗалыктагы юри­дик мәсьә­ләләрне хәл иткән­дә, авылдашларына рәсми кәгазь­ләр төзеш­кәндә аның белеме бүген дә бик кирәк.

Гомумән, Биктимер Кор­бан­гали улы – Ба­һаветди­новлар динас­тия­сенең, Рәис, Рөс­тәм, Наил Баһа­вет­­ди­новларның, нык­­лы таянычы. Хәләл җефете Рәйсә Хәлиул­ла кызы белән дүрт кыз тәрбия­ләп үстерделәр. Җиде оныгы һәм дүрт туру­нының сөекле картә­тисе ул.

Шушы көннәрдә Биктимер абый 80 яшен билгели. Гомерен кеше­ләргә хез­мәт итеп үткәргән, олы ихтирамга лаек ветеран бүген дә сафта – “Салават” агрофирмасы юристы булып эшли. Җәмәгать эшлә­рен­нән дә читтә калмый – ветераннар советын җитәк­ли. Усылы авылы тарихына багышланган китапны әзерләп бастыру идеясе белән чыга. 500 данә тираж белән басыл­ган, төсле фото­рәсемнәр бе­­лән бизәлгән бу затлы, зәвык­лы китапны, чын мәгъ­нәсендә, Усылы авылы­ның хезмәт сөючән халкына, шул исәптән, Биктимер Рә­кыйпов­ның үзенә дә, һәйкәл дип атарга мөмкин.


.