-8 °С
Болытлы
Гәзиткә язылуVKOKTelegramЯRus
Барлык яңалыклар

Туган түгел, туганнан да артык

Күршеләр турында шулай диләр. Чыннан да, үзен хөрмәт иткән, инсафлы һәм тәрбияле кеше күршесе белән тату яши. Мич ягып җылынган заманнардан алып, алар өчен иң якыны – “ут күрше” булган. Аңа кереп, ут кузы гына түгел, йөрәк җылысы да алып чыкканнар.

Дөньяның барлык тарафында да күрше хакын Тәңре хакына тиңләп санлыйлар. Парижда “Европа Күршеләр көне” дә игълан ителгән. Май аеның соңгы атнасында билгеләнә торган бу көннең авторы Атаназ Перифан, кешеләрнең аерым-аерым, еш кына ялгыз яшәвенә каршы чыгып, күршеләрнең – бер урамда, шәһәрдә, континентта яшәү­челәрнең рухи бердә­м­­леген булдыру башлангычы белән чыга һәм хуп­лау таба. Бу көнне күпләр катлаулы хәлдә калган күршеләренә ярдәм оештыра, бүләкләр алыша.

Балачакта безнең күр­ше Чибәр әби, еш кына үзе пешергән берәр тәмле әй­бер алып керә дә, “Менә мо­ны ашап куегыз әле – йөрәгегезгә ял булсын”, дия иде. Аның сүзләрен аңла­маган без – бала-чага: “Йө­рәк ничек арый соң ул?” – дип аптырый идек. Үз го­мерендә үлемечле ачлыклар күргән әбекәй уйчан гы­на елмая иде... Бүген үзем дә күршемә күчтәнәч керткәндә эчтән генә шул сүзләрне кабатлыйм, ач булмасак та, аһ, бу йөрәк­ләр еш кына ял сорый шул!

Бәйрәм көнне генә түгел, күрше хәлен мөмкин кадәр ешрак белешеп, татулыкта яшәүләргә ни җитә!
Читайте нас в