Барлык яңалыклар

Монда тарих саклана...

Тарихны без, беренче чиратта, кәгазьгә теркәлгән мәгълүматлар, елъязмалар, дәүләт җитәкчеләре тарафыннан кабул ителгән рәсми документлар аша өйрәнәбез. Алар кайда саклана соң? Җавап гади – тарихи архивларда. Монда алар катгый тәртиптә, тиешле һава шартларында һәм җаваплы хезмәткәрләрнең даими күзәтүе астында тотыла.

9 июньдә бөтен дөнья Халыкара архивлар көнен билгели. Бу үзе үк “тарих сакчыларының” кешелек өчен әһәмиятен күрсәтеп тора. Әлеге бәйрәм 2007 елның ноябрендә Канаданың Квебек шәһәрендә узган Халыкара архивлар советының Генераль ассамблеясе тарафыннан игълан ителә. 1948 елның 9 июнендә ЮНЕСКО әлеге оешманы төзү турында карар чыгарган була. Шуңа күрә бәйрәм көне өчен нигез итеп әлеге дата алына.

Халыкара архивлар советы – дәүләт карамагындагы оешма түгел. Аны үткәнне саклау белән шө­гыльләнүчеләрнең һөнәри берлеге дип тә атарга мөмкин. Бүгенге көндә ул дөньяның 190 илендә эшләүче миллион ярым архив хезмәткәрен берләштерә. Оешма архивларны саклау һәм алар белән файдалану тәртибен халыкара стандартларга салу, архивчыларның һөнәри осталыгын күтәрү өлкәсендә зур эш башкара.

Архивчы хезмәте искиткеч җаваплы һәм әһәмиятле. Чөнки ул, чын мәгънәсендә, мәгълүмат үзәге белән идарә итә. Архивлардагы документлар дәүләткә генә түгел, һәркайсыбызга да кирәк. Аларга мохтаҗлык кемдә дә туарга мөмкин. Мәсәлән, кайсыбызныңдыр хезмәт кенәгәсе югалса, яисә, ниндидер сәбәпләр аркасында, эш урыны турында мәгълүмат анда кермәгән булса, хаклы ялга чыкканда, архивка барып, тиешле документларны күтәрткәч, дөреслекне исбат итәргә мөмкин. Авыл, нәсел тарихлары да архивларда саклана. Димәк, шә­җәрәләр төзегәндә алар ярдәменнән тыш берни дә эшләп булмый.

Русиядә архив хезмәте Петр I заманында барлыкка килә. Шуннан бирле ул, катлаулы үсеш юлы кичереп, үткәннәр белән киләчәкне бәйләп торучы күпер вазыйфасын башкара. Бәйрәмегез белән, архивчылар!
Читайте нас в