Барлык яңалыклар
Календарьда бу көн
28 июнь 2016, 02:00

Беренче “Боинг”... күл буенда җыелган

1916 елның 29 июнендә һавага иң беренче “Боинг” самолеты күтәрелгән. Бүген дөньяга таныл­ган самолетның “картәтисе” ул чакта бөтенләй башка кыяфәттә булган. Беренче сынау да үзенчәлекле килеп чыккан.

Самолетны АКШ инженеры Уильям Боинг җыйган. Эшләр Юнион күле буендагы корылмада барган. Су өстеннән очып китеп су өстенә төшә торган самолетны сынар вакыт та җиткән. Очкычны сынар өчен оста пилотны җәлеп иткән. Гомере өчен шүр­ләпме, пилот тиешле вакытка килмәгән. Уильям Боинг аптырап тормаган. Штурвал артына утырып, беренче тапкыр һавага күтәрелгән. Шул ук елда Боинг үзенең компаниясен теркәгән. Нибары ике ел үткәч пред­приятиедә 300 кеше эшләгән. 1927 елда “Боинг” истреби­тель­ләре һәм элемтә самолетлары җыела башлый. 1929 елда компания АКШта авиасәнәгать лидерларының берсенә әве­релә.

Бүгенге көндә “Боинг” самолетлары иң ышанычлы һәм уңайлы санала. Алар Русиядә дә пассажирлар ташый.
Читайте нас в