Барлык яңалыклар
Календарьда бу көн
16 июль 2016, 02:00

Бәлеш көне кайчан булыр?

18 июль Америка Кушма Штатларында дәүләт бәйрәме – Хот-дог көне бар. Бу ризыкның кайчан һәм ничек пәйда булуын беркем дә белми. Ләкин анда 1893 ел ук “Булкадагы сосиска елы“ дип аталган бул­ган. Рәсми рәвештә Хот-дог көне 1957 елдан билгеләп үтелә. 1994 елда исә Хот-дог һәм сосискалар советы оештырылып, әлеге ризыкларның сыйфатына, рекламасына зур игътибар бирелә башлый.

Табиблар һәм диетологларның искәртеп, кисәтеп торуларына карамастан, АКШта, башка илләрдә, шулай ук Русиядә хот-дог яратучылар бихисап. Һәр америкалы елына уртача 60 хот-дог ашый дип санала. Илнең Бәйсезлек көнендә 150 миллионлап сосискалы булка америкалылар ашказанына юл ала.

Кем ничектер, ә безгә үзебезнең татар милли ашлары: өчпочмак, зур һәм кечкенә бәлешләр күпкә тәмлерәк тоела. Кызганыч ки, аларны, хот-догны, я булмаса, чәкчәкне зурлаган кебек зурлаучы, туган көннәрен үткәрүче, аларга багышлап комиссияләр төзүче, ярышлар оештыручы гына юк. Ләкин, кем белә, бәлки, киләчәктә Башкортстанда яисә Казанда Бәлеш көннәре дә үтә башлар әле.
Читайте нас в