Популяр Гуцу

Программалаштыру буенча белгечләрнең хезмәте белән без адым саен — телевизор, радио, телефон һәм башка техника кулланганда очрашабыз. Программист иң кирәкле һөнәр­ләрнең берсенә әверелеп бара, дип әйтү дә артык булмас.

— Мин дә киләчәктә программист булырга хыялланам, — ди Уфа шәһәренең 94нче лицееның 9нчы сыйныф укучысы Данис Батыршин.

Данис әлегә программалаш­тыруның беренче баскычларын өйрәнә. Яшьтәшләре компьютер уеннары белән көн үткәрсә, ул уенны булдыру өстендә баш вата.

— Компьютер уены эшләү хыялы күптән бар иде, — дип уртаклаша башлаучы программист. — Моны ничек башкарып чыгу уе белән Интернет киңлек-ләрен иңләдем. Уен эшләү өчен түләү­сез “движок” барлыгын белдем. Сюжет уйлап таптым. Төп героем — сыйныфташым Эдуард Гуцу, бик кызыклы егет. Ул криминаль структуралар белән “көрәшә”, кызын бәладән коткарырга “тырыша”. Тискәре геройларның берсе — Ксения. Әмма тормышта ул усал түгел. Уенда “Милан” исемле сыйныфташым да бар. Уенның беренче версиясен (мин аны “Plosive Gutsu” дип атадым) бер ай дәвамында көне-төне эшләдем. Аны информатика укытучыбыз Людмила Борисовнага күрсәт­тем, ул аны үтә гади дип тапты. Бу сүзләрдән соң кәеф бераз кырылды, аны да сюжетка кертү теләге булып алды. Әлбәттә, бу шаяру гына. Чәмләнеп, “Plosive Gutsu-2”не эшләдем. Ул катлаулырак. Ә хәзер уенның өченче өлеше өстендә баш ватам.

Әйткәндәй, программалаштыру — Данисның бердәнбер мавыгуы түгел. Беренче сыйныфтан ук ул математика белән кызыксына. Бу фәннән мәктәп, төбәк, республика олимпиадаларында төрле дәрәҗәдәге җиңүләр яулаган. “Башкортстан­ның сәләтле балалары” исем­ле­генә кертелгән. Театр түгәрә­­генә йөргән, Константин Хабен­скийның театр студия­сендә шөгыльләнгән, “Нур” театры репертуарындагы “Нурлы сәфәр” спектаклендә Малай ролен башкарган. Шашка, хор, бассейн, өстәл теннисы, тагын да әллә ничә түгәрәктә сынаган үзен.

— Эдуард уенны хупладымы соң? — дип сорыйм Данистан.

— Башта мин аңа уенны күрсәтергә куркып йөрдем. Әм­ма хәбәр тиз таралды, Эдуар­д­ның популярлыгы артты. Хәзер мәк­тәптә сыйныфташым Гуцуны бел­мәгән кеше дә калмагандыр инде. Әлбәттә, уеным билгеле топ-компанияләр эшләгән уен­нардан бик күпкә калыша, әмма мин бу өлкәдә эшләячәкмен әле. Уеным­ның киләчәктә миңа табыш ките­рүенә өме­тем зур.