Машина төзүчеләр, бәйрәм белән!

Авыр сәнәгатьнең мөһим өле­шен тәшкил иткән машиналар төзелеше тармагы Русиядә XVIII гасырда барлыкка килә. Тәүге мәлләрдә авыл хуҗалыгы юнәле­шендәге машиналар чыгару җайга салына, XX гасыр башларында исә металл кисү станоклары, авто­мобильләр җитештерү үзләш­тере­лә.

Башкортстанда машина төзү тармагы барлыкка килү үткән га­сырның 30нчы елларында казанлыклы турбина һәм Уфа моторлар төзү заводлары салына башлау белән тыгыз бәйле. Төбәк­тә авыр сәнәгать үсешенә Бөек Ватан сугышы чорында илнең көнбатыш республикаларыннан төрле завод­ларның күчерелүе дә зур йогынты ясый. 60-70 елларда машина төзелешенең киң колач алуы Башкортстанда нефть эш­кәртү тармагына нигез салыну белән бәйле. Нәтиҗәдә, машина төзү тармагы продукциясе җитеш­терү кискен үсеш кичерә. 1960-90 елларда Башкортстанда металл кисүче станоклар җитештерү 11 процентка, шул исәптән санлы программа буенча станоклар чыгару 9 тапкыр арта.

Хәзерге чорда республиканың машина төзү өлкәсендә әйдәүче предприятиеләре булып Уфа моторлар төзү берләшмәсе, Нефтекама үзбушаткыч автомобильләр, Стәрлетамак станоклар, Бәләбәй “Автонормаль” заводлары, Уфа­ның “Гидравлика”, “Прогресс” җәм­гыятьләре тора. Тармакка караган үзаллы предприятиеләр шулай ук Күмертау, Туймазы, Салават, Благовещен шәһәрләрендә дә урнашкан.

Шуңа бәйле рәвештә, Машина төзүчеләр көне нәкъ әлеге төбәк­ләрдә киң бәйрәм ителә. Кагыйдә буларак, бәйрәм чараларында машина төзү тармагының алдынгы хезмәткәрләренә, ветераннарга кадер-хөрмәт күрсәтелә, дәүләт бүләкләре тапшырыла. Бу җәһәт­тән күләмле чаралар Уфа моторлар төзү берләшмәсендә дә көте­лә.