Вөҗданлы тормыш үрнәге

Ул 1921 елның 21 маенда Мәскәү­дә физика укытучысы гаиләсендә дөньяга килә. 1942 елда Мәскәү дәүләт универ­ситетының физика факультетын тәмамлый. 1945 елда СССР Фәннәр академиясе каршындагы П. Н. Лебедев исе­мендәге Физика институтының аспирантурасына укырга кереп, 1947 елда кандидатлык диссертациясе яклый. 1953 елда “физика фәннәре докторы” дә­рә­җәсен ала һәм СССР Фәннәр акаде­мия­сенең хакыйкый әгъзасы итеп сайлана.

Андрей Сахаров водород бомба­сының “атасы” булып санала. Әлеге корал китерәчәк афәтләрне барысыннан да яхшырак аңлаганлыктан, ул барлык гомерен атом-төш шартлатуларына каршы көрәшкә багышлый. 1960 еллар азагыннан башлап, СССРда кеше хокукларын яклау хәрәкәтенең башында тора. Дәүләт тарафыннан эзәрлекләнүчеләрне яклый, үлем җәзасын тыю өчен көрә­шә, совет гаскәрләренең Әфган­станга кертелүенә кискен каршы чыга. Тынычлыкны саклау өчен салган хезмәтләре өчен ул 1975 елда Нобель премиясенә лаек була.

Совет хакимияте Андрей Сахаровның хокук яклау өлкә­сендәге эш­чәнлеген ничек тыярга белми. 1980 елда ул, барлык дәүләт бүләкләреннән дә мәхрүм ителеп, Горький (хәзер­ге Түбән Новгород) шәһә­ренә сөрелә. “Үзгәртеп кору” процесслары башлангач кына ул шәхсән Михаил Горбачев тарафыннан хатыны Раиса Максимовна башлангычы белән азат ителеп, Мәскәүгә кире кайтарыла. Соңрак халык депутаты булып сайлана, демократик хәрәкәтнең башында тора.

1989 елның 14 декабрендә йөрәк өянәгеннән вафат булып, Мәскәүнең Востряков зиратына җирләнә.
Бүген Андрей Сахаровның исеме илебез халкы өчен вөҗ­данлы тормыш, һәртөрле гадел­сезлекләр белән килешмәү­чәнлек үрнәге булып хезмәт итә.