+26 °С
Болытлы
Гәзиткә язылуVKOKTelegram
Барлык яңалыклар
Календарьда бу көн
15 декабрь 2016, 02:00

Каләм – корал, сүз – пуля ул!

Һәр журналист өчен мөһим канун — дөреслекне яктырту. Кызганычка каршы, гаделлек өчен көрәшүче каләм осталарының гомерләре дә кыела. “Кайнар нокта”лар, хәрби конфликтларда журналистлар да һәлак була. Аларны искә алу максатында Русия Журналистлар берлеге Журналистларны искә алу көнен башта 1991 елның 11 декабрендә үткәрә. Соңгы елларда бу дата 15 декабрьгә күчерелде.

Мондый истәлекле көн юкка гына билгеләнми. 1991 елда Югославиядә Русия телевидениесе хәбәрчесе Виктор Ногин белән оператор Геннадий Куренной һәлак була. Тикшерү журналистлар утырган машинаны серб боевиклары утка тотканын ачыклый.

хөкүмәт карамагында булмаган Журналистларны яклау комитеты мәгъ­лү­мат­лары буенча 2013 елга дөньяда 70 журналистның гомере өзелгән. Киңкүләм мәгълү­мат ча­раларының 29 хезмәткәре Сүрия­дә башын салган. Гыйрак белән Мисыр да бик күпләрнең гомерен өзгән. Шулай ук Пакистан, Сомали, Һиндстан, Әф­ганстан, Израиль, Бразилия һәм Филиппины да журналистлар өчен хәвефле урын санала. Журналист­ларның халыкара хә­вефсезлек институты (INSI) 2014 елда Украинаны журналистлар өчен иң хәвефле төбәк дип игълан итте. Мәгълүм булуынча, илнең көньяк-көнчыгы­шындагы хәрби конфликтта Русия журналистлары Андрей Стенин, Анатолий Клян, Игорь Корнелюк һәм Антон Воло­шинның гомерләре өзелде. Алар Батырлык ордены белән бүләкләнде. Журналистлар Владислав Листьев, Дмитрий Холодов, Лариса Юдина, Анна Политковская, Наталья Эстемирова, Анастасия Бабурова һәм башка­ларның исемнәре дә онытылмый. Аларның үлеменә китер­гән сәбәпләр әле дә булса ачыкланмаган.

Һәлак булган журналистларны 3 майда, Бөтендөнья матбугат иреге көнендә дә искә алалар. Ел саен 8 сентябрьдә Журналистларның халыкара теләктәшлек көне билгеләнә. Бу дата икенче бөтен­дөнья сугышында һәлак булган чех журналисты Юлиус Фучик исеме белән бәйле.

Ату коралы белән бәйле булмаса да, журналист һөнәре дөнья­дагы иң хәвефле һөнәрләрнең берсе булып кала. Вазыйфасын үтә­гәндә башын салучы үткен каләм ияләренең исемлеге ел саен тулылануы шул хакта сөйли.
Читайте нас: