Саумы, апрель!

Сулар таша, кошлар кайта,
Ачыла җир карасы.
Кыш та түгел, җәй дә түгел
Март белән май арасы...

Җырлап килгән апрельләргә
Кемнең исе китмәгән?
Җәй исе дә килә аннан,
Кыш исе дә бетмәгән...

Яз төсенә керә дөнья
Апрель кояшы көлгәч!
Яшәреп китсен йөрәкләр
Күңелгә язлар кергәч...

Ләйсән Якупова.

Истәлекле көннәр, һөнәри бәйрәмнәр һәм юбилейлар

1 – Халыкара көлке көне;
– Халыкара кошлар көне
– “Тулпар” журналының баш мөхәррире урынбасары, филология фәннәре кандидаты, доцент, Башкортстанның атказанган матбугат һәм киңкүләм мәгълүмат хезмәткәре Илдус Фазлетдиновка – 50 яшь.
2 – Халыкара аутизм проблемалары хакында мәгълүмат тарату көне;
– Халыкара балалар китабы көне.
4 – Русиянең атказанган, Башкортстанның халык артисты Тәнзилә Хисамовага – 80 яшь.
6 – Геологлар көне.
7 – Бөтендөнья сәламәтлек көне.
8 – Хәрби комиссариат хезмәткәрләре көне.
12 – Бөтендөнья авиация һәм космонавтика көне.
13 – Башкортстанның халык артисты, режиссер һәм педагог Ольга Мусинага – 60 яшь.
16 – Бөек Ватан сугышында Совет гаскәрләренең Берлин операциясен башлавына 80 ел.
18 – Башкортстан Республикасы халыкларының милли киеме көне;
– Халыкара һәйкәлләр һәм тарихи урыннар көне.
19 – РСФСРның һәм БАССРның атказанган сәнгать эшлеклесе, Салават Юлаев исемендәге дәүләт премиясе лауреаты, режиссер Лек Вәлиевның тууына 90 ел;
– химия фәннәре докторы, профессор, Уфа фән һәм технологияләр университеты ректоры Вадим Захаровка – 50 яшь.
20 – Шагыйрь Батыр Вәлидинең тууына 120 ел;
– Башкортстанның халык язучысы, Бөек Ватан сугышы яугире Талха Гыйниятуллинның тууына 100 ел.
21 – Әдәбият галиме, педагог, язучы һәм публицист Сәгыйдулла Хафизовка – 80 яшь;
– Русиянең атказанган, Баш­кортстанның һәм Татарстанның халык артисты, Салават Юлаев һәм Габдулла Тукай исемендәге дәүләт премияләре лауреаты, җырчы, галим һәм педагог Идрис Газиевка – 65 яшь.
22 – Халыкара Җир көне.
26 – Бөек татар шагыйре Габдулла Тукайның туган көне.
29 – Халыкара бию көне;
– Уфада Октябрь революциясе һәм Гражданнар сугышы геройларына һәйкәл ачылуга 50 ел;
– Русиянең атказанган, Баш­кортстанның халык артисты, җырчы һәм педагог Җәмил Әбделмановка – 60 яшь.
30 – Совет яугирләренең Берлинда Рейхстаг түбәсенә Җиңү байрагын кадавына 80 ел;
– әдәбият галиме һәм туган якны өйрәнүче Морат Рәхимкуловның тууына 100 ел.

Сынамышлар

* Апрель артык җылы булса, май салкын, җилле булыр. 
* Апрельнең алтысында торна кычкырса, ел яхшы килә. 
* Апрель яңгырлы булса, гөмбә уңар. 
* Ай башында яшен яшьнәсә, җәй җылы килер һәм чикләвек мулдан булыр. 
* Апрельдә көндез – кызу, төнлә салкынча булса, җылы җәй юрыйлар. 
* Ай ахырында төннәр йолдызлы булса, ашлык уңар. Соңгы ун көнендә яңгырлар яуса, ел уңдырышлы булыр. 
* Апрельдә каен суы күп акса, җәй яңгырлы килер. 
* Апрельдә карлыгачлар килмәү – салкын язга.