Гыйнвар килә, каршы алыгыз!

Чыршылар купшы,
Җемелди утлар.
Бәйрәмнәр белән
Башлана гыйнвар.

Энҗе-көмештән
Киеме – бик бай
Өр-яңа елны
Башлаучы бу ай!

Яңа яуган кар
Җемелди, көлә...
Гыйнвар башлана –
Яңа ел белән!

Ләйсән Якупова.

Истәлекле көннәр, һөнәри бәйрәмнәр һәм юбилейлар

1 – Яңа ел бәйрәме;
татар халкының бөек шагыйре Һади Такташның туына 125 ел;
Уфа телеүзәгеннән СССРның Үзәк телевидениесе программаларының трансля­цияләнә башлануына – 60 ел.
2 – Археолог, тарих фәннәре кандидаты, Башкортстанның атказанган мәдәният хезмәткәре Анатолий Пшеничнюкның тууына 90 ел.
3 – Башкорт милли хәрәкәте лидер­ларының берсе, партия һәм дәүләт эшлеклесе Харис Йомагуловның тууына 135 ел;
Русиянең атказанган мәдәният хезмәткәре, Башкортстанның халык артисты Наилә Галәветдиновага – 80 яшь;
шагыйрә, журналист, Башкортстанның атказанган матбугат һәм киңкүләм мәгълүмат хезмәткәре Зөһрә Алтынбаевага – 75 яшь;
билгеле татар драматургы Гамир Насрыйның (Краснокама районының Иске Янъегет авылыннан) тууына 110 ел.
4 – БАССРның атказанган төзүчесе, Социалистик Хезмәт Герое Равил Бәхти­гәрәевның тууына 100 ел.
5 – композитор, Башкортстанның атказанган сәнгать эшлеклесе Нур Даутовка 70 яшь.
7 – Раштуа (Рождество) бәйрәме;
– Татарстанның халык язучысы, СССРның Дәүләт премиясе лауреаты Гомәр Бәшировның тууына 125 ел.
8 – Шагыйрь, галим Гали Чокрыйның (Мөхәммәтгали Габделсалих улы Киеков) тууына 200 ел.
11 – Халыкара рәхмәт белдерү көне;
Тыюлыклар һәм милли парклар көне;
Шүлгәнташ дәүләт табигать тыюлыгы оештырылуга – 40 ел.
12 – Русия прокуратура хезмәткәрләре көне.
13 – Русия матбугаты көне;
татар әдәбияты классигы, күренекле прозаик, драматург, әдәбият тәнкыйтьчесе һәм җәмәгать эшлеклесе, Г. Тукайның фикердәше Фатыйх Әмирханның тууына 140 ел;
“Акбузат” балалар журналы нәшер ителә башлауга – 35 ел.
15 – Миграҗ кичәсе;
Хәрби-Диңгез флотының Баш штабы көне;
Җаек (Уральск) шәһәрендә татар телендә беренче демократик юнәлештәге әдәби-иҗтимагый айлык “Әл-гасрел-җәдит” (“Яңа гасыр”) журналы рәсми чыга башлавына – 120 ел;
БАССРның атказанган зоотехнигы, Социалистик Хезмәт Герое Рәис Баһаветди­новның тууына 100 ел;
Инженер-нефтьче, техник фәннәр кандидаты, халыкара информатика академиясе академигы Раян Вахитовның тууына 90 ел.
16 – “Тулпар” журналының бүлек мөхәр­рире, шагыйрь, журналист, Башкорт­станның атказанган мәдәният хезмәткәре Мөнир Вафинга – 65 яшь.
18 – Күренекле шагыйрь Галимов Сәләмнең тууына 115 ел.
21 – Русия инженер гаскәрләре көне;
Шагыйрь, Бөек Ватан сугышы яугире Төхфәт Моратның туына 120 ел.
23 – Халыкара кулдан язу (почерк) көне.
24 – Талантлы композитор Газиз Дәү­ләтбирдинның тууына 75 ел.
25 – Русия студентлары көне;
Халыкара Интернетсыз көн;
Башкортстанның халык шагыйре Тамара Ганиевага – 75 яшь.
26 – “Кызыл таң”ның элекке легендар фотожурналисты, Бөек Ватан сугышы яугире, РСФСРның һәм БАССРның атказанган мәдәният хезмәткәре Әгъләм Зараевның тууына 100 ел.
27 – Данлыклы курайчы, Русиянең атказанган, Башкортстанның халык артисты, Салават Юлаев исемендәге дәүләт премиясе лауреаты Азат Аеткуловка – 70 яшь.
29 – Автомобиль уйлап табу көне.
31 – Халыкара ювелирлар көне.

Сынамышлар

* Гыйнвар җылы булса, яз соңара. Гыйнвар җылы – март салкын. 
* Гыйнвар карсыз һәм суык булса, җәй коры һәм эссе була. 
* Гыйнварда кар күп яуса, бураннар еш булса, җәй яңгырлы була. 
* Гыйнварның икенче яртысы кояшлы торса, уңыш яхшы була. 
* Гыйнварда коры һәм суык булса, язын кар тиз эреп бетә. 
* Гыйнвар суык булса, июль коры һәм эссе була.
* Бу айда боз сөңгесе күренсә, уңыш яхшы була.
* Елның беренче ае болытлы булса, икмәк уңмаска мөмкин. 
* 14 гыйнварда кар яуса, икмәкле ел була.
* 19 гыйнварда көн аяз икән, җәй коры, болытлы көн булып кар да яуса, җәен явым-төшемнәр гадәттәгечә булып, ел яхшы килә.
* 25 гыйнварда кояш чыкса, кошлар иртә килер, кар яуса, җәй яңгырлы була.