Уята да, юата да белә ул март!

Иркәләнеп кенә
Йокысыннан
Уянган кыздай ул...
Башланырга торган яздай,
Бетмәгән кыштай ул...
Кышлар япкан пәрдәләрне
Ача акрын гына...
Елмаюы үзе нурлы,
Үзе салкын гына...
Үзе көчле! Моны аңлап
Елый сөңге-бозлар...
Елмаеша башлый ешрак
Яшь егетләр-кызлар...
Шундый бу ай – уята да,
Юата да белә...
Пышылдый кебек таллары:
“Ниһаять, март килә!”

Ләйсән Якупова.

Истәлекле көннәр, һөнәри бәйрәмнәр һәм юбилейлар

1 – Башкорт гаиләсе көне;
– Башкортстанның һәм Татар­станның халык артисты, һәвәскәр композитор һәм җырчы Зифа Нагаевага – 70 яшь.
2 – Бакчасарай шәһәрендә татарча нәшер ителгән “Тәрҗеман” гәзите мөхәррире, язучы, җәмәгать эшлеклесе, мәгърифәтче Исмәгыйль Гаспринскийның тууына 175 ел.
3 – Бөтендөнья Язучылар көне;
– шагыйрь һәм журналист, БАССРның атказанган мәдәният хезмәткәре Фәйзи Гомәровның тууына 100 ел.
4 – Дәүләт эшлеклесе, хокук белгече, юридик фәннәр докторы, профессор, Салават Юлаев ордены кавалеры Зөфәр Еникеевка – 75 яшь.
8 – Халыкара хатын-кызлар көне.
10 – Архивлар көне.
14 – Хор дирижеры, режиссер, Баш­кортстанның атказанган сәнгать эшлеклесе һәм мәдәният хезмәткәре Нәфирә Иксановага – 75 яшь.
15 – Кадер киче.
16 – Башкортстанның халык артисты Рәфыйга Галинага – 75 яшь.
18 – Кырымның Русиягә кушылу көне.
19 – Су асты көймәсендә хезмәт итүчеләр көне;
– балалар язучысы, Шәехзадә Бабич исемендәге яшьләр дәүләт премиясе лауреаты Зөлфия Күскилдинага – 50 яшь.
20 – Ураза гаете.
21 – Бөтендөнья шигърият көне;
– Нәүруз бәйрәме;
– Халыкара урманнар көне;
– Халыкара курчак театрлары көне.
22 – “Башфармация” дәүләт унитар предприятиесе оештырылуга – 100 ел.
23 – Күренекле җырчы, РСФСРның һәм БАССРның халык артисты Радик Гәрәевның тууына 70 ел.
25 – Русиянең мәдәният хезмәт­кәрләре көне.
26 – Дин әһеле, имам-хатыйп, медицина фәннәре кандидаты, Халыклар дуслыгы ордены кавалеры, Мифтахетдин Акмулла исемендәге премия лауреаты Мөхәммәт Галләмовка – 75 яшь;
– шагыйрь һәм журналист Инсур Яһүдинның тууына 75 ел.
27 – Бөтендөнья театр көне.
30 – Татарстанның халык шагыйре һәм атказанган сәнгать эшлеклесе, Г. Тукай исемендәге дәүләт премиясе лауреаты Рәдиф Гаташка – 85 яшь.

Сынамышлар

* Мартта күк күкрәсә, салкыннар көтегез.
* Күк күкрәмичә генә яшен күрсәгез, җәй салкын булыр.
* Март яңгырлы булса, җәй гөмбәле булыр.
* Мартта суык һәм коры булса – икмәк уңар.
* Мартта боз сөңгеләре озын булса, яз озак килер.
* Мартта томаннар еш төшсә – яңгырлы җәйгә.
* Март ахырында карның тиз эрүе һәм суларның тиз китүе дә – яңгырлы җәй билгесе.